© NASA Earth Observatory / Lauren Dauphin / 2026 йил март ойида Landsat 9 сунъий йўлдоши объективидаги Ришат геологик тузилмаси
Мавритания шимолида, Адрар платоси ҳудудида табиат ва тарих уйғунлашган ҳайратланарли манзаралар ёйилиб ётади. Бу олис саҳро бурчаги инсон цивилизациясининг энг қадимий изларини ўз бағрида сақлаб келаётган ноёб маконлардан бири ҳисобланади.
Бу ерда палеолит даврига оид тош қуроллар, неолит даврига тегишли қоятош расмлари ҳамда қадимда карвон йўллари устида хизмат қилган ўрта аср манзилгоҳлари қолдиқлари топилган. Улар бу ҳудуднинг минг йиллар давомида инсон ҳаёти билан чамбарчас боғлиқ бўлганини кўрсатади.
Космосдан қараганда, бу манзарани биринчи навбатда табиат шакллантиргандек таассурот уйғотади. Шамол таъсирида пайдо бўлган улкан қум “денгизлари”, турли рангдаги дунлар ва қора тусли саҳро қопламалари платонинг юзасини ўзига хос тарзда безаб туради. Қадимий сув оқимлари эса бу ерда чуқур водийлар ва қуриб қолган дарё ўзанлари тармоғини яратган.
Бироқ энг кўзга ташланадиган геологик ҳодиса бу — платонинг шарқий қисмида жойлашган улкан ҳалқасимон тузилма, яъни Ришат тузилмаси ҳисобланади. Унинг мураккаб концентрик шакли илк бор 1930-йилларда француз географлари томонидан ўрганилиб, “Ришат тугма тешиги” деб номланган.
Кейинчалик Эд Уайт ва Жеймс МакДивитт каби астронавтлар уни космосдан суратга олиб, бутун дунё эътиборини ушбу табиий феноменга қаратган. Шундан сўнг у кенг жамоатчилик орасида “Саҳро кўзи” номи билан машҳур бўлиб кетган.
Тахминан 40 километрга яқин кенгликка эга бўлган ушбу тузилма дастлаб метеорит тушиши натижасида пайдо бўлган катта кратер деб ҳисобланган. Чунки катта космик жисмлар Ер юзасида айнан шундай айлана шаклли излар қолдириши мумкин.
Бироқ замонавий геологик тадқиқотлар бу қарашни инкор этиб, Ришат тузилмаси аслида ер ости магматик жараёнлари натижасида юзага келган кучли емирилган гумбаз эканини аниқлаган. Вақт ўтиши билан турли қатламдаги тоғ жинслари ҳар хил тезликда емирилиб, ҳалқасимон структураларни ҳосил қилган.
Тузилманинг тўқ сариқ ва кулранг ранглари эса ер ости ва ер усти жинслари ўртасидаги фарқни яққол намоён этади. Бу эса нафақат геологик жараёнларни, балки табиатнинг миллион йиллар давомидаги ўзгаришларини ҳам акс эттиради.
Қисқача айтганда, Ришат тузилмаси — бу нафақат геологик феномен, балки Ер тарихининг “очиқ дарслиги”дир. У инсонни ҳам ўтмишга, ҳам табиатнинг беқиёс кучига яна бир бор ҳайрат билан қарашга ундайди.
“Zamin”ни Telegram'да ўқинг!
