Сурхондарё вилоятининг Олтинсой туманидаги Вахшивор тоғларида сайр вақтида йўлдан адашиб қолган 4 нафар фуқаро Фавқулодда вазиятлар вазирлиги қутқарувчилари томонидан соғ-саломат топилди.
Маълум қилинишича, 10 май куни Сурхондарё вилояти Фавқулодда вазиятлар бошқармасига “112” тизими орқали хабар келиб тушган. Унда Олтинсой тумани “Вахшивор” маҳалла фуқаролар йиғини ҳудудида жойлашган тоғли ҳудудда бир гуруҳ фуқаролар адашиб қолгани айтилган.
Хабар олингач, ФВВ қутқарувчилари зудлик билан кўрсатилган манзилга етиб борган. Мутахассислар ҳудудда қидирув-қутқарув ишларини бошлаб, тоғли жойларда фуқароларнинг эҳтимолий ҳаракат йўналишларини ўрганган.
Олиб борилган тезкор ҳаракатлар натижасида сайр қилиш мақсадида тоғ ҳудудига чиққан 4 нафар фуқаро топилди. Улар хавфсиз жойга олиб чиқилган. Энг муҳими, ҳодиса оқибатида ҳеч ким тан жароҳати олмаган.
Вахшивор тоғлари табиати гўзал, аммо тоғли ҳудудларда йўлни йўқотиш, об-ҳаво ўзгариши ёки алоқа сифати пасайиши каби ҳолатлар хавф туғдириши мумкин. Шу боис бундай жойларга чиқишдан олдин йўналишни аниқ белгилаш, яқинларга манзил ҳақида хабар бериш ва зарур эҳтиёт чораларини кўриш муҳим.
Қутқарувчиларнинг тезкор ҳаракати натижасида вазият салбий оқибатларсиз якунланди. Бу ҳолат яна бир бор эслатади: табиат қўйнида дам олиш яхши, лекин хавфсизлик биринчи ўринда бўлиши шарт. Тоғда “йўлни биламан” деган ишонч баъзан GPSдан ҳам тез адаштиради.
“Zamin”ни Telegram'да ўқинг!
