Самарқанд вилоятида коррупция билан боғлиқ яна икки ҳолат фош қилинди. Давлат хавфсизлик хизмати ходимлари томонидан ўтказилган тезкор тадбирларда солиқ тизими ва маҳаллий ҳокимиятда фаолият юритган масъул шахслар ноқонуний пул олиш билан боғлиқ ҳолатларда ушланди.
Маълум қилинишича, Булунғур туманида фаолият олиб борувчи “Бухгалтерия маркази” давлат муассасаси ҳисобчиси фермер хўжалигига ҳисобланган 150 миллион сўмлик солиқ қарздорлигини камайтириб беришни ваъда қилган. У бу хизмати эвазига фермер хўжалиги раҳбаридан аввал 3 миллион сўм олган.
Кейинчалик мазкур ҳисобчи яна қўшимча 15 миллион сўм талаб қилган. У ушбу маблағни Булунғур тумани солиқ инспекцияси бошлиғи ўринбосари билан биргаликда олаётган вақтда ДХХ ҳамда Иқтисодий жиноятларга қарши курашиш департаменти ходимлари томонидан ашёвий далиллар билан қўлга олинган.
Яна бир ҳолат Каттақўрғон туманида аниқланган. 2025 йилда туман ҳокими ўринбосари лавозимида ишлаган шахс фуқарони тиббиёт бирлашмасига ишга жойлаштириб қўйишни ваъда қилган. У бунинг эвазига 14 миллион сўм олгани, аммо берган ваъдасини бажармагани маълум бўлган.
Тезкор тадбир давомида ҳозирда собиқ ҳоким ўринбосари ҳисобланган ушбу шахс олган пул маблағининг бир қисмини, яъни 1000 АҚШ долларини қайтариб бераётган вақтда фош этилган.
Ҳозирда ҳар икки ҳолат юзасидан жиноят ишлари қўзғатилган. Тергов ҳаракатлари давом этмоқда.
Бу каби ҳолатлар мансаб ваколати, ишонч ва давлат тизимидаги масъулиятдан шахсий манфаат йўлида фойдаланиш қанчалик оғир оқибатларга олиб келишини яна бир бор кўрсатмоқда. Солиқ қарзини “камайтириб бериш” ёки ишга жойлаштириш ваъдаси ортида фуқароларнинг ишончи, тадбиркорларнинг меҳнати ва давлат тизимига бўлган муносабат туради.
Қисқаси, Самарқандда фош этилган ушбу икки ҳолат коррупцияга қарши кураш ҳали ҳам долзарб эканини кўрсатди. Қонундан айланиб ўтишга уринганлар охир-оқибат қонун олдида жавоб беради. Бу ерда формула оддий: хизмат — халқ учун, лавозим — шахсий фойда учун эмас.
“Zamin”ни Telegram'да ўқинг!
