Барселона ҳужумчиси Роберт Левандовски жорий мавсум якунида клубни тарк этишини расман эълон қилди. Полшалик афсонавий ҳужумчи Spotify Камп Ноу стадионидаги сўнгги ўйинидан сўнг мухлислар ва жамоадошлари билан хайрлашди. У тўрт йиллик фаолияти давомида каталонияликлар сафида 192 та ўйинда майдонга тушиб, 119 та гол уришга муваффақ бўлди. Бу ҳақда Goal.com хабар беради.
Жамоанинг ёш юлдузи Ламине Ямал ўзининг ижтимоий тармоқдаги саҳифасида устозига миннатдорчилик билдириб: "Биз сизни соғинамиз, афсона", дея қисқа ва таъсирли хабар қолдирди. Френки де Ёнг эса Левандовски билан майдонда ва майдон ташқарисида ўтказган йиллари учун миннатдорчилик билдириб, унга келгуси фаолиятида омад тилади.
Реал Бетисга қарши кечган сўнгги уй учрашувида бош мураббий Ханси Флик 83-дақиқада Левандовскини захирага олди. Стадион мухлислари полшалик футболчини ўрнидан туриб, олқишлар билан кузатиб қўйишди. Бу лаҳзалар футболчи учун жуда ҳиссиётли кечди ва у кўз ёшларини тия олмади.
Ханси Флик Левандовскини ҳақиқий профессионал ва ёшлар учун ўрнак бўладиган футболчи сифатида таърифлади. Мураббийнинг сўзларига кўра, бундай даражадаги ҳужумчини жамоада алмаштириш жуда қийин вазифа ҳисобланади. Левандовски Барселона сафида жами еттита соврин, жумладан, учта Ла Лига чемпионлигини қўлга киритган.
“Zamin”ни Telegram'да ўқинг!
