Манчестер Сити ҳужумчиси Эрлинг Холанд Англия Премер-лигасининг бошқа жамоаларига қарата кескин огоҳлантириш билан чиқди. Норвегиялик юлдуз чемпионлик пойгасида Арсенал жамоасига имконият бой берилганидан сўнг, ушбу аламли мағлубият кейинги мавсум учун қўшимча куч бўлиши кераклигини таъкидлади. Бу ҳақда Goal.com хабар беради.
Манчестер Сити жамоасининг чемпионлик учун кураши Борнмутга қарши ўйиндаги дурангдан сўнг расман якунига етди. Виталити Стедиумда кечган баҳсда 1:1 ҳисоби қайд этилди ва бу натижа 2025-26-йилги мавсум тугашига бир тур қолганда Арсенал жамоасининг чемпионлигини математик жиҳатдан нақд қилди. Эрлинг Холанд сўнгги дақиқаларда гол уриб умид уйғотган бўлса-да, Пеп Гуардиола шогирдлари ғалаба тўпини кирита олишмади.
Ўйиндан сўнг ўз норозилигини яширмаган Эрлинг Холанд, жамоа иккинчи ўрин билан кифояланмаслиги кераклигини айтди. "Биз ғазабда бўлишимиз керак, ичимизда олов ёниши лозим, чунки бу натижа биз учун етарли эмас. Келаси мавсумда лигада ғолиб чиқиш учун қўлимиздан келган барча ишни қиламиз", — деди ҳужумчи Ситй Студиос нашрига берган интервюсида.
Шунингдек, Эрлинг Холанд Челси жамоасига қарши кечган Англия кубоги финалидан сўнг тикланиш қийин бўлганини тан олди. Унинг сўзларига кўра, Уембли стадиони ва финаллардаги ҳиссий босим Борнмутга қарши ўйинда ўз таъсирини кўрсатган. Шунга қарамай, у буни баҳона сифатида кўрсатмасликка чақирди.
Манчестер Сити жамоаси ушбу мавсумни Англия кубоги ва Карабаоу кубоги ғолиби сифатида якунламоқда. Эрлинг Холанд икки соврин муҳимлигини, бироқ клубнинг асосий мақсади ҳар доим Англия Премер-лигаси бўлиб қолишини қўшимча қилди.
“Zamin”ни Telegram'да ўқинг!
