Ливерпул жамоаси ёзги трансфер ойнасида ўзининг асосий ҳимоячиларидан бирини текинга қўйиб юборишга яқин турибди. Sky ва Даилй Маил нашрлари берган хабарга кўра, марказий ҳимоячи Ибраҳима Конате клуб билан янги шартнома борасида келиша олмаган. 27 ёшли футболчи Жаҳон чемпионатидан сўнг жамоани эркин агент сифатида тарк этиши кутилмоқда. Бу ҳақда Goal.com хабар беради.
Ваҳоланки, сўнгги бир йил давомида Мерсисайд клуби ва футболчи ўртасидаги музокаралар ижобий якунланиши айтилаётган эди. Апрел ойида ЛЪEқуипе нашри келишув деярли тайёрлигини ёзган, Ибраҳима Конатенинг ўзи ҳам музокаралар тўғри йўналишда кетаётганини таъкидлаган эди. Бироқ вазият кутилмаганда кескин ўзгариб кетди ва у беш йиллик фаолиятидан сўнг клубдан кетишга қарор қилди.
Франциялик ҳимоячининг кейинги манзили ҳозирча номаълум, аммо Реал Мадрид унга асосий даъвогар сифатида кўрилмоқда. Мадридликлар сафида Давид Алаба мавсум охирида кетиши, Эдер Милитао эса жиддий жароҳатлар сабаб узоқ муддатга сафдан чиққани боис, клуб ҳимоя чизиғини кучайтириши шарт. Антонио Рюдигер билан шартнома узайтирилиши кутилаётган бўлса-да, жамоада марказий ҳимоячилар танқислиги сезилмоқда.
Шу билан бирга, Даилй Маил нашри PSJ клубини ҳам Конате учун асосий вариантлардан бири сифатида кўрсатмоқда. Гарчи Париж клубида Маркиньос ва Виллиан Пачо каби ҳимоячилар бўлса-да, француз футболчисининг ўз ватанига қайтиши эҳтимоли юқори. Бу трансфер Ливерпул учун катта йўқотиш бўлади, чунки у ўтган мавсумда Виргил ван Дижк билан бирга 51 та ўйинда майдонга тушган эди.
Ушбу кутилмаган кетиш Боруссия Дортмунд учун ҳам жиддий оқибатларга олиб келиши мумкин. Агар Ливерпул ҳимоя чизиғидаги бўшлиқни тўлдириш учун Дортмунднинг асосий ҳимоячиларига эътибор қаратса, немис клуби ўз етакчиларидан айрилиб қолиши ҳеч гап эмас. Ҳозирда Ливерпул таркибида фақат Джо Гомес соғлом захира ҳимоячиси сифатида қолмоқда.
“Zamin”ни Telegram'да ўқинг!
