Хитойнинг илғор UBTech Robotics компанияси Гуанси автоном районидаги чегара пунктларида одамсимон роботларни фаолиятга татбиқ этиш бўйича 37 миллион долларлик йирик шартнома имзолади. Бу, Хитой давлат тузилмаларида антропоморфик машиналардан фойдаланишнинг энг йирик мисоли ҳисобланади. Ветнам билан чегарадош ҳудудлардаги объектлар учун етказиб бериш декабр ойида старт олади.
Ўзини таъминловчи "ақлли ёрдамчи"
Лойиҳа доирасида Walker S2 роботлари жойлаштирилади. Бу модел июл ойида намойиш этилган ва дунёда биринчи бўлиб аккумуляторини ўзи алмаштира оладиган машина сифатида тақдим этилган эди. Бу инновацион тизим инсон аралашувисиз деярли сутка давомида ишлашга имкон беради, чунки робот аккумуляторни тахминан уч дақиқада алмаштиради.
Чегара назорат-ўтказиш пунктларига жойлаштириладиган бу "ақлли ёрдамчилар" сайёҳларга йўл кўрсатади, одамлар оқимини тартибга солади, патрул ишларида ёрдам беради ва логистика вазифаларини бажаради.
Келажакдаги режалар кўлами
UBTech компанияси йил охиригача 500 та робот етказиб беришни, келгуси йили ишлаб чиқариш ҳажмини ўн карра оширишни ва 2027 йилгача йилига 10 000 дона робот ишлаб чиқариш ниятида. Чегара назорати бугунги кунда Хитойнинг сунъий интеллектни ривожлантириш стратегиясининг асосий йўналишларидан бирига айланмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
