“Muhtasham asr” yulduzi Xolid Ergench sudda yolg‘on gapirganlikda ayblandi

Turkiya shou-biznesi yana bir shov-shuvli voqea bilan ommaviy e’tibor markaziga chiqdi. Mashahur “Muhtasham asr” tarixiy serialining bosh qahramoni — sulton Sulaymon II obrazini yaratgan mashhur aktyor Xolid Ergench sud hukmiga binoan 1 yil 10 oy muddatga qamoq jazosiga hukm qilindi. Bu haqda Turkiyaning Anadolu agentligi xabar berdi.

Ergench tergov jarayonida haqiqatga zid ko‘rsatmalar berganlikda ayblandi. Dastlab Istanbul shahri sudi unga 2 yil 3 oylik ozodlikdan mahrum qilish jazosini tayinladi. Biroq, sudda o‘zini hurmat bilan tutishi va hamkorlik qilgani uchun jazo muddati qisqartirildi. Shuningdek, u bilan birga sudlanuvchi aktyor Rizo Kojao‘g‘li ham qamoq jazosini oldi, ammo ikkalasi ham ilgari sudlanmagani inobatga olinib, jazo shartli hisoblandi. Demak, ular hozircha qamalmaydi.

Norozilik namoyishlari va yolg‘on bayonotlar

Ushbu sud ishi 2013 yilda Istanbuldagi mashhur Gezi bog‘ida boshlangan va mamlakat miqyosidagi yirik hukumatga qarshi namoyishlar bilan bog‘liq. Mazkur namoyishlar avval boshda atrof-muhitni muhofaza qilish maqsadida boshlangan edi, ammo keyinchalik siyosiy tus oldi va keng ommaviy xarakatga aylandi.

Xolid Ergench mazkur ish doirasida guvoh sifatida tergovga jalb qilingan. Prokuratura uni jinoiy harakatlardagi asosiy shaxslardan biri — aktyor va faol Memet Ali Alobora bilan aloqalariga doir savollarga javob berish uchun chaqirgan. Ergench tergov paytida u bilan yaqin aloqasi yo‘qligini bildirgan bo‘lsa-da, keyinchalik ochilgan telefon yozuvlari va ularning birgalikdagi fotosuratlari uning ko‘rsatmalariga zid ekani ma’lum bo‘ldi.

Ayblovlar va aktyorning munosabati

Turkiya prokuraturasi Xolid Ergenchni 2 yildan 4 yilgacha ozodlikdan mahrum qilishni so‘rab, unga nisbatan yolg‘on ko‘rsatma berganlik ayblovini ilgari surdi. Sud jarayonida Ergench o‘zini oqlashga urinib, barcha savollarga to‘g‘ri javob berganini va yolg‘on bayonot bermaganini ta’kidladi. Uning ta’kidlashicha, u ishda ayblangan boshqa shaxslar — jumladan menejer Oysha Borim bilan yaqin munosabatda bo‘lmagan, balki faqat yuzaki tanish bo‘lgan.

Ergench, ommaviy axborot vositalarida tarqalgan fotosuratlar va telefon ma’lumotlari bilan bog‘liq holatlardan keyin, o‘zini jamoatchilik oldida noto‘g‘ri tushuntirgani uchun afsusda ekanini bildirdi. Shuningdek, u holatni sud tartibida qayta ko‘rib chiqtirish uchun qarshi da’vo arizasi bermaganidan afsusdaligini ham aytib o‘tdi.

Xulosa o‘rnida

Bir qarashda shou-biznesga doir oddiy xabardek tuyulsa-da, mazkur ish Turkiyada mashhur shaxslar ham qonun oldida javobgar ekanini yana bir bor ko‘rsatdi. Ergenchning nomiga bog‘liq bu voqea nafaqat kino muxlislari, balki jamoatchilik e’tiborini ham jalb etdi. Uning hayotdagi qiyofasi seriallardagi shon-shuhratdan farqli ekani yana bir bor namoyon bo‘ldi. “Zamin”ni Telegramʻda oʻqing!