Rossiyaning Ukrainaga qarshi qo‘shilgan harakatlarini to‘xtatish rejasi yo‘q. Bu haqda Rossiya Bosh shtabi boshlig‘i Valeriy Gerasimov rasmiy bayonot berdi.
Uning so‘zlariga ko‘ra, «qo‘shinlar (kuchlar) birlashgan guruhi maxsus harbiy operatsiya doirasidagi vazifalarni hujum amaliyotlari bilan bajarishni davom ettiradi». Shuningdek, u kuz mavsumidagi yo‘nalishlar uchun qo‘shinlar oldiga qo‘yiladigan maqsadlar yangidan belgilab olinishini ta’kidladi.
Gerasimovning nutqi aks etgan videoni Rossiya Mudofaa vazirligi e’lon qildi. Unda 2025 yil bahor-yoz kampaniyasi natijalari sarhisob qilingani va keyingi bosqich vazifalari belgilab olingani aytib o‘tildi.
— «Strategik tashabbus to‘liq Rossiya Qurolli Kuchlari qo‘lida», — dedi u. Gerasimovning ta’kidlashicha, hozirgi paytda Rossiya armiyasi Lugansk hududining qariyb 99,7 foizini, Donetskning 79 foizini, Zaporojening 74 foizini va Xerson viloyatining 76 foizini nazorat qilmoqda.
Shu bilan birga, Gerasimov 28 va 30 avgust kunlari Ukrainaga qaratilgan ommaviy zarbalar «harbiy-sanoat kompleksiga aloqador obyektlarga yo‘naltirilganini» bildirdi. Biroq OAV xabarlariga ko‘ra, zarbalardan so‘ng Kiyevda ko‘p qavatli uy podezdi vayron bo‘lgan, 25 kishi, jumladan to‘rt nafar bola halok bo‘lgan, boshqa hududlarda esa fuqarolik infratuzilmasiga katta zarar yetgan.
Umumiy hisobda Rossiya armiyasi Ukraina hududining taxminan 20 foizini nazorat qiladi. Biroq ushbu yerlarning katta qismi urushning dastlabki haftalarida egallangan. Deep State ma’lumotlariga ko‘ra, urushning oxirgi 1010 kuni mobaynida Rossiya bor-yo‘g‘i 5842 km² maydonni o‘z qo‘liga olgan, bu esa mamlakat hududining atigi 0,97 foizini tashkil etadi.
The Economist tahlilchilari hisobicha, 2025 yil yoziga kelib Rossiya armiyasi har 0,038 km² maydon uchun bitta harbiyni yo‘qotgan. Ularning fikriga ko‘ra, bunday sur’atda Donetsk, Lugansk, Zaporoje va Xerson viloyatlarining ma’muriy chegaralariga eng ertasi 2029 yil fevralida chiqish mumkin. Ukraina hududini to‘liq bosib olish uchun esa yana qariyb 89 yil kurash olib borish zarur bo‘ladi.
