Trampning Nobel ishorasi Modi bilan munosabatlarni keskinlashtirdi

AQSH prezidenti Donald Tramp Hindiston bosh vaziri Narendra Modi bilan telefon orqali suhbatda Nyu-Dehli o‘z nomzodini tinchlik bo‘yicha Nobel mukofotiga qo‘yishi zarurligini nazarda tutgani katta norozilikka sabab bo‘ldi. Bu haqda The New York Times nashri suhbatdan xabardor manbalarga tayanib ma’lum qildi.

Ma’lumotga ko‘ra, mazkur voqea prezident va bosh vazir o‘rtasida 17 iyun kuni bo‘lib o‘tgan muloqotda sodir bo‘lgan. Suhbat paytida Tramp Modiga Pokiston tomonidan AQSH yetakchisini Nyu-Dehli va Islomobod o‘rtasidagi otishmalarni to‘xtatishdagi roli uchun Nobel mukofotiga ilgari surish rejalashtirilayotganini bildirgan. Keyinchalik Pokiston hukumati bu taklifni amalga oshirgan.

NYT manbalariga ko‘ra, Trampning fikrlari Modiga «Pokiston bilan bir xil pozitsiyani egallash kerakligiga ishora» bo‘lib tuyulgan. Hindiston rahbari esa bu gapdan qattiq g‘azablanib, AQSHning otishuvlarni to‘xtatish bo‘yicha kelishuvga hech qanday aloqasi yo‘qligini qayd etgan. Shuningdek, Modining Tramp nomzodini qo‘llab-quvvatlamasligi siyosiy aloqalardagi munosabatlarni sezilarli ravishda yomonlashtirdi, deya yozadi NYT.

Trampning nomzodini Pokistondan tashqari yana oltita davlat qo‘llab-quvvatladi. The Economist ta’kidlashicha, AQSH prezidenti bu mukofotni qo‘lga kiritishni juda ham orzu qilmoqda.

Shu bilan birga, ikki davlat munosabatlarining sovushiga AQSH tomonidan Hindiston mahsulotlariga nisbatan joriy etilgan yangi bojlar ham ta’sir ko‘rsatdi. Frankfurter Allgemeine Zeitung ma’lumoticha, Tramp so‘nggi haftalarda Modi bilan to‘rt marta telefon orqali bog‘lanishga harakat qilgan, ammo Hindiston bosh vaziri suhbatdan bosh tortgan.

Bundan tashqari, Tramp Hindiston iqtisodiyotini «o‘lik» deb atagani va mamlakatning Rossiyadan neft sotib olgani uchun hind tovarlariga qo‘shimcha 25 foizlik bojlar joriy qilgani ortidan munosabatlar yanada taranglashdi. Ushbu choralar 27-avgustdan kuchga kirdi va endi Hindiston mahsulotlarining AQSHga importi uchun umumiy boj 50 foizni tashkil etmoqda.

Bu voqealar Vashington va Nyu-Dehli munosabatlarida yangi inqiroz nuqtasiga aylandi. Trampning Nobel ishorasi ortidan ikki davlat o‘rtasidagi siyosiy aloqalarda keskin o‘zgarishlar kuzatilishi mumkinligi aytilayapti.