Uoll-stritning “tirik afsona”si hisoblangan Uorren Baffet Berkshire Hathaway’dagi bosh direktor (CEO) lavozimini tark etyapti. Xorij OAVlariga ko‘ra, kompaniyadagi “rul” 63 yoshli Greg Abel qo‘liga o‘tadi.
Ma’lumotlarga qaraganda, 95 yoshli Baffet CEO vazifasidan ketsa-da, Berkshire’da rais (chairman) sifatida qoladi va Omahadagi ofisidan ishlashda davom etishi aytilmoqda.
Greg Abel kompaniyada begona emas: u avval Berkshire Hathaway Energy’ni boshqargan, keyin esa sug‘urtadan tashqari yo‘nalishlardagi bizneslar uchun mas’ul rahbar sifatida ishlab kelgan. Endi esa unga butun “imperiya” meros qolyapti — va eng katta savollardan biri: Berkshire’ning ulkan naqd zaxirasi bilan nima qilish.
Berkshire Hathaway’ning o‘zi oddiy kompaniya emas — bu butun bir ekotizim. U temiryo‘l (BNSF), sug‘urta (Geico) va turli brendlardan iborat katta portfelga ega. Baffet esa bir vaqtlar to‘qimachilik fabrikasi bo‘lgan kompaniyani yillar davomida investitsiya gigantiga aylantirgan.
Qizig‘i, Berkshire 2024 yil avgust oyida kapitallashuvi 1 trillion dollardan oshgan, texnologiya sohasidan tashqaridagi birinchi Amerika kompaniyalaridan biri sifatida ham tarixga kirgan edi.
Baffetning shaxsiy yo‘li ham alohida mavzu: u vafotidan keyin yig‘ilgan boylik farzandlari boshqaradigan yangi xayriya jamg‘armasiga yo‘naltirilishini aytgani haqida ham xabarlar bor.
Qisqasi, Berkshire uchun yangi davr boshlanyapti: endi bozor “Abel Baffet darajasida vazmin va uzoqni ko‘ra oladimi?” degan savolga javob izlaydi. Ammo bitta narsa aniq — bu almashinuv shov-shuv emas, tarixiy burilish.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
