O‘ta yengil vazn (61 kg) toifasidagi UFC chempioni Merab Dvalishvilining murabbiyi Jon Vud shogirdining rossiyalik Umar Nurmagomedovga qarshi ehtimoliy revanshi haqida keskin bayonot berdi. Unga ko‘ra, bu safar bahs hakamlar qarorigacha yetmaydi.
Vud “Submission Radio” YouTube kanaliga bergan intervyusida shunday dedi:
“Menimcha, revanshda Merab Umarni yo‘q qiladi. Bu safar Nurmagomedovga juda qiyin bo‘ladi. Ilk to‘qnashuvda Merab kasal va mayda jarohatlar bilan oktagonga kirgandi, baribir g‘alaba qozondi. Revanshda esa finishni ko‘ramiz.”
Eslatib o‘tamiz, Dvalishvili — Nurmagomedov jangi “UFC 311” turnirida kechgan va u yerda gruziyalik jangchi hakamlarning yakdil qarori bilan zafar quchgandi. Vudning ta’kidlashicha, o‘sha kechada Merab o‘zining to‘liq salohiyatini namoyish eta olmagan, shu bois ikkinchi uchrashuvda u yuqori temp, tinimsiz bosim va harakatlanish hisobiga yorqin g‘alaba (finish)ga intilmoqchi.
Shu bilan birga, Umar Nurmagomedov texnikasi serqirra va tayyorgarligi mukammal jangchi sifatida hurmatga sazovor ekani, potensial revansh esa divizion tepasidagi vaziyatni yanada qizdirishi aytilayotir. Hozircha UFC tomonidan bu jangga oid rasmiy tasdiq yoki sanalar e’lon qilingani yo‘q, biroq tomonlar atrofidagi muhokamalar muxlislar qiziqishini yanada oshirib qo‘ydi.
Muxlislar uchun xulosa bir: agar revansh tashkil etilsa, oktagonda yuqori intensivlik, qaynoq klinchlar va ta’qibli parterda tom ma’nodagi “shiddatli” kechani kutish mumkin.
“Zamin”ni Telegramʻda oʻqing!
