Superliganing 25-turidan o‘rin olgan bahsda Namanganda kutilmagan natija qayd etildi. “Navbahor” o‘z maydonida “Bunyodkor”ni qabul qildi va muxlislar uchun noxush bo‘lgan hisobda mag‘lubiyatga uchradi.
Uchrashuv boshidan mehmonlar faol harakat qildi. Imeda Ashortia ilk bo‘limdayoq ikki bor raqib darvozasini ishg‘ol etib, dublga erishdi. Uning aniq zarbalari “qaldirg‘ochlar”ga muhim uch ochkoni taqdim etdi.
Mezbonlar uchun eng yaxshi imkoniyat Ruslan Jiyanovning penalti orqali keldi, ammo u imkoniyatdan foydalana olmadi — darvozabon Valijon Rahimov jamoasini qutqardi.
Bu g‘alaba “Bunyodkor” uchun ramziy ahamiyatga ega bo‘ldi. Chunki jamoa Namanganda so‘nggi bor 9 yil avval g‘alaba qozongan edi. Umuman olganda, “qaldirg‘ochlar” “Navbahor” ustidan 3 yildan beri zafar quchmagan edi. Bu galda ular an’anani buzishga muvaffaq bo‘lishdi.
Zeytullaev boshqaruvidagi jamoa ochkolar sonini 43 taga yetkazib, jadvalda 5-pog‘onada mustahkamlandi. “Navbahor” esa 37 ochko bilan 7-o‘rinda qoldi.
Mahalliy muxlislar jamoadan kuchliroq o‘yin kutgan bo‘lsalar-da, bu bahs “Bunyodkor”ning qayta tiklanish belgisi sifatida baholanmoqda. Imeda Ashortianing formadagi o‘yini va hujumdagi samaradorligi esa muxlislar uchun alohida quvonch bo‘ldi.
Superliga, 25-tur
Navbahor — Bunyodkor 0:2
18 oktabr, Namangan, “Markaziy” stadion
Gollar: Imeda Ashortia (7, 20).
Foydalanilmagan penalti: Ruslan Jiyanov (27).
Navbahor — Umid Ergashev (Shukron Yo‘ldoshev, 46), Azim Ahmedov, Zabihillo O‘rinboyev (Asad Jo‘raboyev, 84), Saidazamat Mirsaidov (Gillerme Gedesh, 46), Jamshid Boltaboyev, Ruslan Jiyanov, Doston Abdulhayev (Shohmalik Komilov, 46), Pedro Augusto (Muhammadali G‘iyosov, 46), Muhammadbobur Mo‘ydinov, Abbos G‘ulomov, Igor Gabriel
Bunyodkor — Valijon Rahimov, Najmiddin Normurodov, Imeda Ashortia (Aleksandr Zevadinov, 87), Rasul Yo‘ldoshev (Martin Shroler, 58), Temurxo‘ja Abduxoliqov (Matiya Krivokapich, 58), Marko Bugarin, Nosir Abdusalomov (Mirkamol Annamatov, 76) Asad Rahimjonov, Itsuki Urata, Abdulaziz Abdurashidov (Bobur Yo‘ldoshev, 58), Azizbek To‘lqinbekov
Ogohlantirishlar: Abbos G‘ulomov (11), Itsuki Urata (71).
Namangandagi bu o‘yin jamoalarning turnirdagi maqsadlariga ham ta’sir ko‘rsatdi. “Navbahor”ning keyingi bahslardagi harakati endi muxlislar uchun sinov bo‘ladi, “Bunyodkor” esa yangi ruhda yuqoriga umid bilan qaramoqda.
“Zamin”ni Telegramʻda oʻqing!
