Argentina futboli atrofida jiddiy shov-shuv ko‘tarildi. “La Nacion” nashri tarqatgan ma’lumotlarga ko‘ra, mamlakat terma jamoasi 2026 yilgi Jahon chempionatida ishtirok etish huquqidan mahrum bo‘lishi ehtimoli paydo bo‘ldi. Sabab — Argentina futbol assotsiatsiyasi (AFA) doirasidagi keng qamrovli korrupsiya ishi.
Manbalarga asoslansak, tergov markazida AFA prezidenti Klaudio Tapia, uning yaqin ishonchli shaxsi Pablo Tovigino hamda moliya bo‘limi rahbari o‘rinbosari Lusiano Nakis turibdi. Sud organlari Pilar shahri hududida joylashgan 10 gektarlik yirik mulk, vertolyot qo‘nish maydonchasi, ot fermasi va unda saqlanayotgan 50 dan ortiq vintaje avtomobillar qonuniy manbalar hisobidan olingan-olinmaganini o‘rganmoqda.
Nashr ta’kidlashicha, agar mazkur ish sud muhokamasiga chiqib, davlat organlarining futbol federatsiyasi faoliyatiga noqonuniy aralashuvi tasdiqlansa, FIFA qattiq chora ko‘rishi mumkin. Bu esa amalda jahon chempioni bo‘lgan Argentina terma jamoasining mundialdan chetlatilishiga olib kelishi ehtimolini kuchaytiradi.
Ma’lumotlarga qaraganda, huquqni muhofaza qiluvchi organlar avvalroq AFA binosida, shuningdek, mamlakat bo‘ylab 13 ta futbol klubida reydlar o‘tkazgan. Tergovchilar klublar pul yuvish va noqonuniy moliyaviy operatsiyalarda ishtirok etgan bo‘lishi mumkin, degan gumonni ilgari surmoqda.
Ayniqsa, “Sur Finanzas” kompaniyasi bilan bog‘liq holatlar diqqat markazida. Ushbu kompaniya klublarga kreditlar ajratgani, keyin esa televideniye va marketing huquqlari orqali to‘lovlarni qaytarib olgani taxmin qilinmoqda. Qizig‘i shundaki, kompaniya AFA rahbari Tapianing yaqin do‘sti Ariyel Vallejoga tegishli ekani aytilmoqda.
Hozircha rasmiy qaror qabul qilinmagan. Biroq tergov chuqurlashib borayotgani, ish xalqaro maydonga chiqishi ehtimoli yuqoriligini ko‘rsatmoqda. Agar ayblovlar isbotlansa, futbol olamida katta shok yuzaga kelishi aniq — chunki gap nafaqat alohida shaxslar, balki butun bir jahon chempioni bo‘lgan terma jamoaning taqdiri haqida ketmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
