Ispaniya chempionatining navbatdagi turida "Real Madrid" safarda "Real Betis" bilan 1:1 hisobida durang o'ynadi. Uchrashuvning 17-daqiqasida Vinisius raqib darvozabonining xatosidan foydalanib hisobni ochgan edi. Shundan so'ng madridliklar ko'plab imkoniyatlarga ega bo'lishdi, biroq Mbappe, Bellingem va boshqa hujumchilar vaziyatlardan foydalana olishmadi. O'yinning 94-daqiqasida sobiq "Arsenal" himoyachisi Ektor Bellerin himoyadagi tartibsizlikdan unumli foydalanib, hisobni tenglashtirdi. Bu haqda Goal.com xabar beradi.
Ushbu natijadan so'ng Alvaro Arbeloa shogirdlari peshqadam "Barselona"dan 8 ochko ortda qolmoqda. Agar kataloniyaliklar shanba kuni "Xetafe"ni mag'lub etsa, farq 11 ochkoga yetishi mumkin. "Real Madrid" himoyasidagi muammolar davom etmoqda: jamoa ketma-ket 10 ta o'yindan beri o'z darvozasi daxlsizligini saqlay olmayapti. Bu klubning 2003-04 yilgi mavsumdan beri qayd etgan eng yomon ko'rsatkichidir.
Uchrashuvda Kilian Mbappe o'ziga xos natija qayd etdi. U klub safida 100 ta o'yin o'tkazgan 10-fransiyalik futbolchiga aylandi. Biroq hujumchi o'yin yakunlanishiga 10 daqiqa qolganida jarohat sababli maydonni tark etishga majbur bo'ldi. Dastlabki ma'lumotlarga ko'ra, unda tizza osti paylari bilan bog'liq muammo yuzaga kelgan.
Madridliklar uchun joriy mavsum omadsiz kechmoqda. Jamoa allaqachon Chempionlar ligasidan chiqib ketgan va endi ichki chempionatda ham imkoniyatlarni boy bermoqda. Kelasi haftada jamoani "Espanyol"ga qarshi safar o'yini va undan keyin chempionlik taqdirini hal qilishi mumkin bo'lgan "El-Klasiko" kutib turibdi. Arbeloa jamoasi endi faqatgina Flik boshqaruvidagi "Barselona"ning ochko yo'qotishiga umid qilishi mumkin.
“Zamin”ni Telegramʻda oʻqing! 
