Madridning “Real” klubida yangi mavsum oldidan katta o‘zgarish kutilmoqda. Cope nashrining xabar berishicha, “Qirollik klubi” sobiq bosh murabbiyi Joze Mourinoni yana Madridga qaytarish arafasida turibdi.
Manba ma’lumotiga ko‘ra, portugaliyalik mutaxassisning tayinlanishi deyarli hal qilingan masalaga aylangan. “Real” rahbariyati mavsum yakunlanganidan so‘ng Mourinoning qaytganini rasman e’lon qilishi kutilmoqda.
“Qaymoqranglilar”ning joriy mavsumdagi so‘nggi uchrashuvi 24 may kuni “Atletik”ka qarshi bo‘lib o‘tadi. Shundan keyin klub yangi bosh murabbiy masalasini ochiq e’lon qilishi mumkin. Madridliklar allaqachon La Liga chempionligi uchun imkoniyatdan mahrum bo‘lgan. Jamoa oxirgi turda “Barselona”ga 0:2 hisobida mag‘lub bo‘lib, musobaqa tugashiga uch tur qolganida kataloniyaliklarning chempionligini rasman ta’minlab berdi.
Joze Mourino “Real”da yanvar oyidan buyon ishlab kelayotgan Alvaro Arbeloa o‘rnini egallashi kutilmoqda. Arbeloa jamoani qiyin pallada qabul qilib olgan bo‘lsa-da, mavsumni sovrinlarsiz yakunlash xavfi klub rahbariyatini keskin qarorlar qabul qilishga undagan ko‘rinadi.
Ayni paytda Mourino “Benfika”da faoliyat yuritmoqda. Agar u “Real”ga qaytsa, Madrid klubi portugaliyalik murabbiy bilan xayrlashish uchun “Benfika”ga taxminan 6 million yevro miqdorida tovon puli to‘lashi kerak bo‘ladi.
Mourino nomi “Real” muxlislari uchun yaxshi tanish. U avval ham madridliklarni boshqargan va klubda kuchli xarakter, qattiq intizom hamda keskin raqobat muhitini shakllantirgan murabbiylardan biri sifatida esda qolgan. Uning qaytishi “Real” uchun yangi davr boshlanishi bo‘lishi mumkin.
Bu qarorning asosiy sababi faqat natijalar emas. Jamoadagi barqarorlik, ichki muhit, tartib va katta o‘yinlardagi xarakterni tiklash ham klub uchun muhim vazifaga aylangan. Mourino esa aynan shunday vaziyatlarda qattiqqo‘lligi va ta’sirchan boshqaruv uslubi bilan tanilgan.
Albatta, portugaliyalik mutaxassisning qaytishi turlicha baholanishi mumkin. Kimlardir uni “Real”ga kuchli ruh va tartib olib keladi, deb hisoblaydi. Boshqalar esa uning uslubi hozirgi futbolchilar avlodiga qanchalik mos tushishini savol ostiga qo‘yadi. Lekin bir narsa aniq: Mourino qaytsa, Madridda tinchlik emas, katta harakat boshlanadi.
“Real” uchun bu mavsum og‘ir saboq bo‘ldi. Endi klub rahbariyati yangi bosh murabbiy orqali jamoani qayta tiklash, sovrinlar uchun kurashish va azaliy raqib “Barselona”ga munosib javob qaytarishni maqsad qilmoqda. Mourino esa bu chaqiriqni qabul qilishga tayyor ko‘rinadi.
“Zamin”ni Telegramʻda oʻqing!
