“PSJ” bosh murabbiyi Luis Enrike Fransiya Liga 1 chempionatining 33-turida “Brest”ga qarshi o‘yindan keyin jamoasining chempionlik poygasidagi holati haqida fikr bildirdi. Parijliklar ushbu bahsda 1:0 hisobida g‘alaba qozonib, mavsum yakuni oldidan juda muhim uch ochkoni qo‘lga kiritdi.
Enrikening ta’kidlashicha, “PSJ” aynan shu ochkolarga muhtoj edi. Uning fikricha, “Brest” ustidan qozonilgan g‘alaba chempionlik masalasini amalda hal qilib bergan.
“Bizga aynan shu ochkolar kerak edi. O‘ylashimcha, biz chempionlik masalasini hal qildik”, — dedi ispaniyalik mutaxassis.
Shu bilan birga, Enrike “Lans”ning joriy mavsumdagi harakatlariga ham yuqori baho berdi. Uning aytishicha, ushbu jamoa chempionat davomida “PSJ”ga jiddiy raqobat ko‘rsatdi va parijliklar uchun mavsumni ancha murakkablashtirdi.
“Lans”ning butun mavsum davomida qanday o‘ynaganini e’tirof etishimiz kerak. Ular juda kuchli qarshilik ko‘rsatdi, bizga rostan qiyin bo‘ldi. So‘nggi ikki mavsumda osonroq edi”, — deya qo‘shimcha qildi Enrike.
Mutaxassisning so‘zlariga ko‘ra, hozir “PSJ” libosini kiygan har bir futbolchi maksimal darajada tayyor bo‘lishi shart. Chunki jamoa oldida bir vaqtning o‘zida ikki katta vazifa turibdi: Fransiya chempionligini rasmiylashtirish va Chempionlar ligasi finaliga yetarli darajada tayyor holda borish.
Enrike “Lans”ga qarshi navbatdagi o‘yin ham jiddiy qabul qilinishini, ammo futbolchilarning yuklamasini nazorat qilish zarurligini ta’kidladi. Uning aytishicha, asosiy e’tibor hozir Chempionlar ligasi finaliga qaratilgan.
“Shuning uchun “Lans”ga qarshi o‘yinga ham xuddi shunday yondashamiz, ammo o‘yinchilarning yuklamasini ham nazorat qilishimiz shart. Asosiy maqsad — Chempionlar ligasi finali”, — dedi u.
Ispaniyalik murabbiy jamoa hali ham Myunxendagi o‘yindan keyingi hissiy holatdan to‘liq chiqib ketmaganini ham yashirmadi. Shu sabab “Brest”ga qarshi bahsga tayyorgarlik oson kechmagan.
“Biz hali ham Myunxendan keyingi holatdan to‘liq chiqib ketmadik. Fikrlarimiz hali ham o‘sha yerda, shuning uchun bu o‘yinga tayyorgarlik ko‘rish qiyin bo‘ldi”, — dedi Enrike.
Shu bilan birga, “PSJ” kiyinish xonasida hali chempionlikni nishonlamagan. Murabbiyning aytishicha, oldinda yana muhim o‘yinlar bor va jamoa barcha e’tiborni shularga qaratishi kerak.
“Kiyinish xonasida bayram qilmadik, chunki oldimizda yana bir o‘yin bor. Mavsumdagi eng muhim bellashuvlardan biri bizni kutmoqda”, — deya ta’kidladi u.
Qayd etish lozim, chempionat yakuniga 2 tur qolganida “PSJ” ikkinchi o‘rindagi “Lans”dan 6 ochko oldinda bormoqda. Qolgan bahslarda kamida 1 ochko to‘plash Parij klubiga chempionlikni rasman kafolatlaydi.
Hozir “PSJ” uchun vaziyat qulay: chempionlik deyarli qo‘lda, Chempionlar ligasi finali esa oldinda. Endi Enrike uchun eng muhim vazifa — futbolchilarni ruhan va jismonan to‘g‘ri holatda ushlab turish. Chunki mavsumning eng shirin qismi aynan hozir boshlanmoqda.
“Zamin”ni Telegramʻda oʻqing!
