Poytaxtimizdagi “Olimpiya shaharchasi”da o‘tayotgan o‘smir qizlar o‘rtasidagi Osiyo chempionatida bugun yarim final bahslari bo‘lib o‘tdi. O‘zbekiston terma jamoasi vakilalari hal qiluvchi bosqich yo‘llanmalari uchun ringga ko‘tarilib, muxlislarga hayajonli, shiddatli va esda qolarli janglar taqdim etishdi.
Kunning dastlabki jangida -46 kg vazndagi vakilamiz Ruhshonabonu Ahadova qozog‘istonlik Milana Inshinaga qarshi ringga chiqdi. Ruhshonabonu jang boshidanoq tashabbusni qo‘lga oldi va raqibasiga o‘z uslubini o‘tkazdi. U 2-raundda texnik nokaut orqali muddatidan avval g‘alaba qozonib, finalga yo‘l oldi.
-48 kg vaznda Farangiz Usvaliyeva yaponiyalik Arisa Yoshinaga bilan kuch sinashdi. Jang juda qiziqarli va keskin o‘tdi. Afsuski, hakamlar qaroriga ko‘ra 0:5 hisobida yapon bokschisi g‘alaba qozondi. Farangiz musobaqani bronza medali bilan yakunladi.
-50 kg vaznda Parvina Shakarova mo‘g‘ulistonlik Aminxair Zorigtsaixanga qarshi ringga ko‘tarildi. To‘liq 3 raund davom etgan bahsda hamyurtimiz yaqqol ustunlik ko‘rsatdi va 5:0 hisobida ishonchli g‘alaba qozonib, final yo‘llanmasini qo‘lga kiritdi.
-52 kg vaznda Marjona Xudoyberdiyeva Vetnam vakili Txi Xong Diyem bilan bahs olib bordi. Yakunda 0:4 hisobida raqiba ustun keldi va Marjona bronza medali bilan cheklandi.
-54 kg vaznda Qumriniso Muhammadova hindistonlik Lahmi Manjunatga qarshi juda murosasiz jang o‘tkazdi. Bahs davomida vakilamiz kuchli xarakter, sabr va ringdagi qat’iyatni namoyish etdi. Qumriniso 4:1 hisobida zafar quchib, finalga chiqdi.
-60 kg vaznda Salomatxon Sardorova xitoylik Xinyu Suiga qarshi ringga chiqdi. Ushbu qarama-qarshilik 3-raundda muddatidan avval yakunlandi. Afsuski, Sardorova yarim finalda o‘z yurishini to‘xtatdi va musobaqani bronza medali bilan yakunladi.
-63 kg vaznda Mehrimax Qilicheva xitoylik Xinyuyelin Tianga qarshi ajoyib jang namoyish etdi. Hamyurtimiz ringda ishonchli harakat qilib, 5:0 hisobida g‘alaba qozondi va finalga yo‘l oldi. Bu jangda Mehrimax raqibasiga deyarli imkoniyat bermadi — toza, ishonchli va “finalga biletni o‘z qo‘li bilan yozib olgan” g‘alaba bo‘ldi.
-66 kg vaznda Diyora Bo‘riboyeva xitoylik Di Qiaoga qarshi bahs yuritdi. Jang juda qiziqarli va teng kurashlar ostida kechdi. Vakilamiz yaxshi harakat qilgan bo‘lsa-da, hakamlar 2:3 hisobida g‘alabani Xitoy sportchisiga berishdi. Diyora musobaqani bronza medali bilan yakunladi.
-70 kg vaznda Karina Ilmuratova qozog‘istonlik Ailin Hojamberdiyevaga qarshi ringga ko‘tarildi. Shiddatli kechgan bahsda Karina o‘zining tayyorgarligi va irodasini ko‘rsatib, 4:1 hisobida zafar quchdi. Shu tariqa yana bir vakilamiz final yo‘llanmasiga ega chiqdi.
-75 kg vaznda Lobar Shaymanova qozog‘istonlik Diana Nadirbek bilan bahs olib bordi. Yakunda 0:5 hisobida Qozog‘iston vakilasi g‘alaba qozondi. Lobar esa Osiyo chempionatini bronza medali bilan yakunladi.
-80 kg vaznda Feruzabonu Kamolova hindistonlik Vanshikaga qarshi ringga chiqdi. Jang yakunida hisob 1:4 ko‘rinish oldi va Kamolova ham bronza medaliga sazovor bo‘ldi.
Kunning so‘nggi jangida +80 kg vazndagi vakilamiz Sohibaxon Xudoyberdiyeva vetnamlik Xan Huyen Truong bilan to‘qnash keldi. Birinchi raundda Sohibaxon hisobda oldinga chiqdi. Ikkinchi raundda esa u raqibasiga imkoniyat qoldirmay, texnik nokaut orqali g‘alaba qozondi va finalga yo‘l oldi.
Shu tariqa, O‘zbekiston o‘smir qizlar terma jamoasi Osiyo chempionati yarim finallarida yorqin ishtirok etdi. Bir nechta vakilamiz finalga chiqqan bo‘lsa, yana bir qator bokschilarimiz bronza medalini qo‘lga kiritdi.
O‘zbekiston boks federatsiyasi xabariga ko‘ra, final bahslarida ham vakilalarimiz oltin medal uchun ringga ko‘tariladi. Bugungi janglar yana bir narsani isbotladi: o‘zbek qizlari ringda nafaqat mahorat, balki xarakter, jasorat va g‘alabaga bo‘lgan ishonchni ham ko‘rsata oladi. Endi finalda oxirgi qadam qoldi — oltin uchun zarba berish vaqti.
“Zamin”ni Telegramʻda oʻqing!
