O‘zbekiston milliy terma jamoasi bosh murabbiyi Fabio Kannavaro Azizbek Turg‘unboyevning Jahon chempionati uchun tarkibga kiritilmagani haqidagi savolga javob berdi. Italiyalik mutaxassis bu qaror shaxsiy munosabatlar bilan emas, futbolchining hozirgi holati va maydondagi ko‘rinishi bilan bog‘liq ekanini ta’kidladi.
Matbuot anjumanida Kannavarodan Turg‘unboyevning terma jamoaga jalb etilmagani uning jismoniy holati bilan bog‘liqmi yoki boshqa sabab bormi, degan savol berildi. Murabbiy bu borada futbolchi bilan jarohatidan keyin alohida suhbatlashganini ma’lum qildi.
“Men Azizbek bilan jarohat olganidan so‘ng alohida gaplashib olganman. Men o‘sha suhbatda unga aytganman — Turg‘unboyev jarohatdan qaytganidan so‘ng yanada ko‘proq o‘zini ustida ishlashi kerak”, — dedi Kannavaro.
Mutaxassisning aytishicha, Turg‘unboyev maydonga qaytgan va ayrim uchrashuvlarda jamoasiga yordam bergan. Biroq uning o‘yindagi harakatlari, jismoniy tayyorgarligi va umumiy holati murabbiylar shtabida yetarli ishonch uyg‘ota olmagan.
“Maydonga qaytdi, ba’zi o‘yinlarda jamoasiga yordam berdi, lekin uning maydondagi harakatlari hamda o‘zini tutishi meni yetarlicha ishontira olmadi”, — deya qo‘shimcha qildi italiyalik murabbiy.
Shu bilan birga, Kannavaro Azizbek Turg‘unboyevning darajasi va terma jamoa uchun qilgan mehnatini yuqori baholashini ham yashirmadi. U futbolchining avvalgi muhim o‘yinlardagi xizmatlari, milliy jamoaga qo‘shgan hissasi va tajribasini alohida e’tirof etdi.
“Men Azizbek Turg‘unboyevni juda yaxshi bilaman, uning darajasini, terma jamoada qilgan oldingi mehnatini, muhim o‘yinlardagi xizmatlarini alohida e’tirof etish kerak”, — dedi Kannavaro.
Ammo murabbiyning fikricha, futbolda qarorlar hozirgi holat, tayyorgarlik va raqobat asosida qabul qilinadi. Jahon chempionati kabi katta musobaqaga eng ishonchli, eng tayyor va murabbiy talabiga javob beradigan futbolchilar olib ketiladi.
Kannavaro tarkibga ko‘proq o‘zini ishontira olgan o‘yinchilarni chaqirganini ta’kidladi. U Turg‘unboyev bilan o‘rtasida hech qanday shaxsiy muammo yo‘qligini ham ochiq aytdi.
“Afsuski, bu futbol. Futbolda bunday holatlar bo‘lib turadi. Shuningdek, men ko‘proq meni ishontira olgan futbolchilarni tarkibga chaqirganman. Bundan tashqari, oramizda hech qanday shaxsiy muammo yo‘q”, — deya fikr bildirdi mutaxassis.
Bu javobdan ko‘rinib turibdiki, Kannavaro qarorni hissiyot bilan emas, jamoaning hozirgi ehtiyoji va futbolchilarning tayyorgarlik darajasi asosida qabul qilgan. Turg‘unboyev uchun esa bu yakuniy nuqta emas, aksincha, yanada qattiq mehnat qilish va terma jamoaga qaytish uchun yangi chaqiriq bo‘lishi mumkin.
Jahon chempionati oldidan raqobat kuchli. Bunday paytda har bir futbolchi o‘zini nafaqat nomi, balki bugungi formasi bilan ham isbotlashi kerak. Azizbek Turg‘unboyevning tajribasi bor, darajasi bor, endi unga faqat avvalgi ishonchli holatiga qaytish talab qilinadi.
“Zamin”ni Telegramʻda oʻqing!
