Joriy yilning 14–23 may kunlari Ruminiya poytaxti Buxarest shahri shaxmat muxlislari e’tibor markaziga aylanadi. Bu yerda “Grand Chess Tour 2026” xalqaro turnirining 2-bosqichi — “2026 Super Chess Classic Romania” musobaqasi bo‘lib o‘tadi.
Nufuzi yuqori bo‘lgan ushbu turnirda dunyoning eng kuchli 10 nafar grossmeysteri ishtirok etadi. Quvonarlisi, ular orasida O‘zbekiston sharafini himoya qiladigan iste’dodli shaxmatchimiz Javohir Sindarov ham bor.
Hamyurtimiz ayni paytda 2776 reyting ochkosi bilan jahon reytingida 5-o‘rinda bormoqda. Bu ko‘rsatkich Sindarovning so‘nggi yillarda qanchalik katta o‘sishga erishgani, elita darajasidagi shaxmatchilar qatoriga ishonch bilan kirib kelganini ko‘rsatadi.
Buxarestdagi musobaqa Javohir uchun navbatdagi jiddiy sinov bo‘ladi. Chunki turnirda Fabiano Karuana, Anish Giri, Vinsent Keymer, Alireza Firuzja, Uesli So kabi jahon shaxmatining eng kuchli vakillari ishtirok etadi. Bunday raqiblarga qarshi har bir partiya katta diqqat, chuqur tayyorgarlik va temir asab talab qiladi.
“Super Chess Classic Romania” musobaqasining umumiy mukofot jamg‘armasi 475 ming AQSH dollarini tashkil etadi. Bu ham turnirning saviyasi va ishtirokchilar darajasi naqadar yuqori ekanini yaqqol tasdiqlaydi.
Musobaqa 14 may kuni Toshkent vaqti bilan soat 18:00 da start oladi. O‘zbekistonlik shaxmat muxlislari esa Javohir Sindarovdan yana yorqin partiyalar, dadil yurishlar va yuqori natijalar kutishmoqda.
Qisqasi, Buxarestda haqiqiy shaxmat bayrami boshlanmoqda. Sindarov uchun bu musobaqa nafaqat reyting va mukofot, balki jahon elitasi orasida o‘z o‘rnini yanada mustahkamlash imkoniyatidir. Endi taxta ustidagi har bir yurish katta ma’noga ega bo‘ladi.
“Zamin”ni Telegramʻda oʻqing!
