Liverpul yarim himoyachisi Florian Virts Muhammad Salahning ijtimoiy tarmoqdagi bahsli posti ostiga nima uchun «layk» bosganiga izoh berdi. Koʻpchilik ushbu postni jamoa bosh murabbiyi Arne Slotga nisbatan tanqid sifatida qabul qilgan edi. Germaniyalik futbolchi jamoa ichida hech qanday isyon yoʻqligini taʼkidlab, misrlik hujumchi shunchaki mavsum yakunidagi oʻz fikrlarini ochiq bayon qilganini aytdi. Bu haqda Goal.com xabar beradi.
Muhammad Salah oʻzining Instagram sahifasida jamoaning hozirgi taktik yoʻnalishini tanqid ostiga olib, sobiq murabbiy Yurgen Klopp davridagi joʻshqin uslubga qaytish kerakligini shama qilgan edi. Bu holat Arne Slot va Salah oʻrtasidagi munosabatlar yomonlashgani, ayniqsa Interga qarshi oʻyindan soʻng vaziyat keskinlashgani haqidagi mish-mishlarni bolalatib yubordi. Florian Virts esa bu voqeani OAV boʻrttirib yuborganini taʼkidlamoqda.
«Mo klubni juda yaxshi biladi, u samimiy inson. U nima deb oʻylasa, shuni aytadi va bu normal holat. Agar kimdir gapirmoqchi boʻlsa, bunga haqli boʻlishi kerak. Menimcha, bu vaziyat aslida boʻlganidan koʻra kattaroq qilib koʻrsatildi. U hech kimga hujum qilmagan», — deya tushuntirdi Wirtz The Athletic nashriga bergan intervyusida.
Yarim himoyachining soʻzlariga koʻra, futbolchilarning ushbu postni qoʻllab-quvvatlashi murabbiyga qarshi chiqish emas, balki jamoadoshiga boʻlgan hurmat belgisidir. Wirtz Salahning mentalitetini va ishga boʻlgan munosabatini qadrlashini, u koʻp narsani koʻrgan tajribali futbolchi sifatida klubni hushyorlikka chaqirganini qoʻshimcha qildi.
Hozirda Liverpul bor eʼtiborini Chempionlar ligasi yoʻllanmasini qoʻlga kiritishga qaratgan. Wirtz jamoa tarkibi kuchli ekanini va yozgi tanaffusdan soʻng yangi mavsumda yanada yaxshiroq natijalar uchun kurashishlarini maʼlum qildi.
“Zamin”ni Telegramʻda oʻqing!
