Germaniyalik mutaxassis Ralf Rangnick Milan klubida tub islohotlarni amalga oshirish uchun asosiy nomzod sifatida koʻrilmoqda. Xabarlarga koʻra, 67 yoshli murabbiy va klub rahbariyati oʻrtasida muzokaralar hal qiluvchi pallaga kirgan. Bir necha yil avval San Siroga oʻtishi amalga oshmagan Rangnick, bu safar yanada kengroq vakolatlar bilan qaytishi mumkin. Bu haqda Goal.com xabar beradi.
Vena shahrida boʻlib oʻtgan uchrashuvda Milan xoʻjayini Gerry Cardinale va klub maslahatchisi Zlatan Ibrahimovic ishtirok etgan. Unda Ralf Rangnick Avstriya terma jamoasidagi faoliyatini yakunlagach, klubda qanday tizim yaratmoqchi ekanligi boʻyicha oʻz shartlarini bayon qilgan. La Gazzetta dello Sport nashrining yozishicha, gap murabbiylik haqida emas, balki butun texnik departamentni nazorat qiluvchi supervayzerlik lavozimi haqida bormoqda.
Rangnickning talablari ancha jiddiy: u asosiy jamoa murabbiyini mustaqil tanlash, oʻzining skautlar va tahlilchilardan iborat katta shtabini olib kelish hamda yoshlar akademiyasini yagona tizimga birlashtirishni istamoqda. RedBird rahbariyati uchun bu Red Bull tizimidagi kabi yosh iqtidorlarni kashf etish va rivojlantirishga asoslangan muvaffaqiyatli modelni joriy etish imkoniyatidir.
Hozirda Avstriya terma jamoasi bilan Jahon chempionatiga tayyorgarlik koʻrayotgan mutaxassis oʻz kelajagi borasida ehtiyotkorlik bilan gapirmoqda. Garchi Avstriya futbol federatsiyasi unga maoshini oshirishni taklif qilayotgan boʻlsa-da, Milan kabi grand jamoada inqilobiy oʻzgarishlar qilish chorlovi Rangnickni koʻproq qiziqtirishi mumkin.
“Zamin”ni Telegramʻda oʻqing!
