“Roma” yangi yilni muvaffaqiyatsiz boshladi. Joze Mourino shogirdlari 2022 yilning ilk uchrashuvida safarda “Milan”dan qaqshatqich zarbaga uchradi. Mavsum boshida Chempionlar ligasi yo‘llanmasini beradigan kuchli to‘rtlik uchun kurashgan rimliklar sekin-asta musobaqa jadvalida quyiga sho‘ng‘imoqda.
Ayni paytdagi natijalar Mourino jamoasi nafaqat Chempionlar ligasi yoki Yevropa ligasi, balki o‘zi hozir o‘zi ishtirok etayotgan Konferensiyalarning ligasining kelasi mavsumida qatnashish huquqini qo‘lga kiritish uchun ham ancha ter to‘kishi kerakligidan dalolat bermoqda.
“Roma” yangi yilda “Olimpiko”dagi ilk uchrashuvini Yevrokuboklar yo‘lidagi to‘g‘ridan-to‘g‘ri raqobatchisi bo‘lgan “Yuventus”ga qarshi o‘tkazishi lozim. Milandagi to‘qnashuvda portugaliyalik mutaxassis shogirdlari ko‘rsatgan o‘yindan keyin ko‘pchilik muxlisu mutaxassis bo‘lajak bahsda turinliklarning imkoniyatini yuqori baholay boshladi.
Joze Mourinoning o‘zi mag‘lubiyatdan so‘ng “Roma”ning o‘zi ham, o‘yini ham, tarkibi ham o‘rtamiyona o‘rinlarga loyiqligini tan oldi. Garchi u bu gaplarni alam ustida aytgan bo‘lsa-da, Rim klubi yuqori maqsadlar uchun kurashishga qodir emasdek ko‘rinayotgani bor gap.
“Yuventus” bilan o‘yin oldidan Mourino kadrlar muammosi qarshisida qoldi. Rimliklar Milanda o‘yinni boy bergani yetmaganidek, asosiy himoyachilari – Rik Kasrdorp va Janluka Manchinidan ayrildi. Har ikki futbolchi maydondan haydalgani bois keyingi bahsni o‘tkazib yuborishga majbur.
O‘yinda ishtirok etmasligi aniq bo‘lgan o‘yinchilarning aksariyati himoyaga mas’ul futbolchilardir. Chap qanot himoyachisi Leonardo Spinatssolaning safga qaytishi yana ikki oyga cho‘zilgan. Federiko Fasio Mourino tomonidan birinchi jamoadan yozdayoq chetlatilgan vahatto mashg‘ulotlarga ham chaqirilmayapti.
Tayanch zonasining ikki vakili – Amadu Diavara va Ebrima Darboye Afrika Millatlari kubogida ishtirok etish uchun “qora qit’a”ga jo‘nab ketgan, ular deyarli bir oysiz qaytmaydi.
Ikkinchi darvozabon Daniel Fuzato va hujumchi Borxa Mayoral koronavirusdan to‘liq tiklanmadi.
O‘yinga ma’lumot tayyorlagan xorijiy nashrlar va saytlar kadrlar muammosi asosiy tarkibga kirishga qiynalayotgan o‘yinchilar, xususan, Eldor Shomurodovga nimalarga qodirligini ko‘rsatib qo‘yish uchun yaxshi imkoniyat ekanini ta’kidlamoqda.
Adolat yuzasidan aytish kerakki, legionerimizning joriy mavsumdagi o‘yinlari soni ko‘p bo‘lgani bilan maydonda o‘tkazgan vaqti juda kam va bu o‘zini ko‘rsatishi uchun yetarli bo‘lmayapti. Aniq statistik faktga tayanadigan bo‘lsak, Eldor A Seriyada 16 ta uchrashuvda qatnashib, jami 514 daqiqa o‘ynadi. Bu vaqt ichida ikkita gol va uchta assist qayd etdi.
- Rimliklarning mavjud kamchiliklariga tarkibdagi yetishmovchiliklar ham qo‘shildi. Shunga qaramay, “Yuventus”ga qarshi uchrashuv Eldor Shomurodov uchun yana bir karra o‘zini ko‘rsatish uchun yaxshi imkoniyatdir. “Roma” qo‘lga kiritgan oxirgi ochkoni aynan Eldorning goli keltirgan edi.
Endi uning oldida muhim pallada maydonga tushib, jamoasiga yana yordam berish imkoni paydo bo‘ldi. Mourino bungacha ham markaziy hujumchi bo‘lgan Shomurodovni qanotda o‘ynatgandi, - deb yozmoqda www.championat.com sayti.
E’tiborga molik yana bir jihat shundaki, “Yuventus” so‘nggi yillarda “Roma”dan har tomonlama kuchli ekanini isbotlab kelgan. Umuman olganda, uzoq tarixga ega bu ikki klub shu kunga qadar A Seriya, Italiya kubogi, Pikki kubogi va Chempionlar kubogida jami 198 marotaba o‘zaro to‘qnash kelgan. Shulardan 94 tasida turinliklarning qo‘li baland keldi. “Roma” 48 marta g‘alabani tantana qilgan bo‘lsa, 56 ta bahs durang bilan tugagan. To‘plar nisbati ham tabiiyki “Yuve” foydasiga – 305:210.
Birinchi davra uchrashuvida “Yuventus” Moyze Kenning yagona goli evaziga g‘alaba qozongan. O‘sha bahsda Jordan Veretu penaltini aniq bajara olmay, hisobni tenglashtirish imkoniyatini qo‘ldan chiqardan. Shomurodov Turindagi bahsda 81-daqiqada o‘yinga qo‘shilgan edi.
Bu gal Joze Mourino hamyurtimizga ko‘proq imkoniyat berishi kutilmoqda. Bu uchrashuv 9 yanvar kuni Toshkent vaqti bilan 22:30 da boshlanadi. “Zamin” yangiliklarini “Odnoklassniki”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
NATO bosh kotibi Ukrainaning frontdagi ahvoli yomonlashganini tan oldi
Har qanday katta yoshdagi kishi yetuk emas
Erdo‘g‘on Turkiya Isroil bilan aloqalarini uzganini ma’lum qildi
Borrel YEIning Isroil bilan muloqotini to‘xtatishni taklif qildi
Raqobat qo‘mitasi birjada Ai-80 benzini boshlang‘ich narxiga cheklov o‘rnatdi
Blinken Isroildan uchta muammoni hal etishni talab qildi
Shavkat Mirziyoyev: “Falastinlik bolalar va ayollarni beg‘araz davolashga tayyormiz”
Britaniya muzeyi mamlakat tarixidagi eng qimmat sovg‘aga ega bo‘ladi
