Soʻnggi vaqtlarda oshxona jihozlari olamidagi eng katta trend — bu "hands-free" (qoʻlsiz boshqariladigan) va AI texnologiyasi asosida ishlaydigan avtomatlashtirilgan yordamchilardir. Ishdan keyin ovqat tayyorlashga quvvati yetmaydigan, ammo mazali taom isteʼmol qilishni xohlaydiganlar uchun koʻplab yangi qurilmalar paydo boʻldi. Shoʻrvani oʻzi kovlaydigan robotlardan tortib, siz televizor koʻrayotganingizda xamir qoradigan non mashinalarigacha — bularning barchasi pishiriq tayyorlash jarayonini ancha soddalashtiradi. Bu haqda Techcrunch.com xabar beradi.
Nosh Chef Robot qurilmasi odatiy multivarka yoki Instant Pot’dan ancha ilgarilab ketgan boʻlib, u pishirish jarayonini deyarli toʻliq avtonom tarzda boshqara oladi. AI yordamida ishlaydigan ushbu robot maxsus kartrijlardan yogʻ, ziravorlar va masalliqlarni aniq miqdorda chiqaradi. Foydalanuvchi masalliqlarni oldindan yuklab qoʻysa kifoya, qolganini robotning oʻzi bajaradi: u toʻgʻraydi, qovuradi, aralashtiradi, porsiyalarga boʻladi va hatto ovqatdan keyin oʻzini oʻzi tozalaydi.
Tizim minglab retseptlar va pishirish usullari boʻyicha oʻqitilgan NoshOS deb nomlangan xususiy AI dasturida ishlaydi. Oʻrnatilgan sensorlar namlik, tekstura va qovurilish darajasini real vaqt rejimida kuzatib, issiqlik va ziravorlar miqdorini moslashtirib boradi. Hozirda Nosh One qurilmasini Kickstarter orqali oldindan buyurtma qilish mumkin, yetkazib berish esa 2026-yilning yoziga rejalashtirilgan.
Yana bir qiziqarli gadjet — StirMate Automatic Pot Stirrer avtomatik aralashtirgichidir. Shoʻrva, sous yoki boʻtqalarni soatlab gaz ustida turib kovlash oʻrniga, ushbu qurilma buni sizning oʻrningizga bajaradi. Bu nafaqat vaqtni tejaydi, balki harakatlanishda qiyinchilikka ega insonlar uchun ham ajoyib yordamchidir. Uning uchinchi avlodi kuchli motor va 10 soatgacha yetadigan akkumulyator bilan jihozlangan boʻlib, qalinroq massali taomlarni ham bemalol aralashtira oladi.
“Zamin”ni Telegramʻda oʻqing!
