Кремль урушни тўхтатиш бўйича музокаралар ҳақида: «Асосий томон — АҚШ»

^{Дмитрий Песков / Фото: kremlin.ru}
Кремль Қўшма Штатларни Украина билан тинчлик музокараларида асосий «томон» деб билади. Бу ҳақда Россия президенти матбуот котиби Дмитрий Песков маълум қилди.

«У ёки бу тарзда, албатта, Украина ҳам музокараларда иштирок этади. Албатта, бу мулоқотда иккитомонлама Россия-Америка музокаралари ҳам бўлади ва албатта Украина жалб қилинган музокаралар ҳам бўлади», деди Кремль вакили.

«Биз, албатта, бу жараёндаги асосий томон Вашингтон эканини тушунамиз», деб қўшимча қилди у.

Песков сўзларига кўра, Россия ва АҚШ президентлари телефон орқали мулоқот чоғида Европанинг тинчлик музокараларида иштирок этиши мумкинлигини муҳокама қилмаган.

«Кечаги суҳбатда бу муҳокама қилинмади ва Европа мавзуси кўтарилмади. Тўғрироғи, бунда европаликларнинг ўзи қандайдир тарзда ўрин эгаллаши учун Вашингтон билан гаплашиши керак бўлади», деди у.

Песковнинг таъкидлашича, энди Москва ва Вашингтон ўртасида «ишчи алоқаларни ривожлантириш» учун муҳлат бериш керак, бунда Россия ва АҚШ президентларининг бўлажак учрашуви «кун тартиби» муҳокама қилинади.

Песков Ар-Риёд (Саудия Арабистони пойтахти) Путин ва Трамп ўртасидаги учрашув жойи сифатида тилга олинганини ва бунинг учун «мос» эканини, бироқ ҳозирча «бу масала бўйича ҳеч қандай қарор қабул қилинмаганини» эслатди.

12 февраль куни АҚШ президенти Доналд Трамп Владимир Путин ва Украина президенти Володимир Зеленский билан телефон орқали мулоқот қилди. Путин билан суҳбатдан сўнг у Украина бўйича музокараларни зудлик билан бошлашга рози бўлганини маълум қилди. Кремль Путиннинг Трамп билан суҳбатини «жуда конструктив, ишчан ва самимий» деб баҳолади. Трамп унинг Путин билан бўлажак учрашуви Саудия Арабистонида бўлиши мумкинлигини айтди. “Замин” янгиликларини “Telegram”да кузатиб боринг