Россия президенти Владимир Путин Украина етакчиси Владимир Зеленский билан музокаралар олиб боришга тайёр, бироқ Украина президентининг қонунийлиги масаласини кўриб чиқиш зарур. Бу ҳақда Россия президентининг матбуот котиби Дмитрий Песков маълум қилди, деб ёзади Дарё нашри.
Кремль вакилининг сўзларига кўра, Путин “зарурат туғилганда Зеленский билан ҳам музокаралар олиб боришга тайёрлигини бир неча бор айтган”.
"Шу билан бирга, Зеленскийнинг ўзининг қонунийлигига шубҳа туғдириш эҳтимоли мавжудлигини кўрсатувчи ҳақиқатни инобатга олган ҳолда, келишувларни ҳуқуқий жиҳатдан расмийлаштиришни жиддий муҳокама қилиш лозим", дея қўшимча қилди Песков.
Владимир Путин бир неча бор Зеленскийнинг қонунийлиги “тугагани, чунки Украинада янги сайловлар ўтказилмагани”ни таъкидлаган.
Москва юридик кучга эга ҳужжатларни имзолашдан аввал “ким билан муносабат ўрнатиш мумкин ва зарурлигини” тушуниб олиши керак, деган Россия етакчиси.
Зеленский 2025 йил 14 февралда Мюнхен хавфсизлик конференциясида сўзга чиқиб, тинчлик музокаралари доирасида фақат ягона россиялик — Владимир Путин билан учрашишини маълум қилган эди.
Бир кун аввал NBC нашри АҚШ Украина делегациясини Саудия Арабистонидаги Россия билан музокараларга таклиф этмагани, чунки Вашингтон Москва ва Киев вакиллари билан алоҳида икки томонлама учрашувлар ўтказиб, кейинчалик қўшма учрашув ташкил этмоқчи экани ҳақида ёзган эди.
"Бу бизнинг Россия билан ҳам, Украина билан ҳам бир хил фаолликда ҳамкорлик қилаётганимизни кўрсатади. Биз ўлимларни тўхтатиб, мустаҳкам тинчликка эришишни хоҳлаймиз", деди телеканал суҳбатдошларидан бири.
NBCънинг Украина президенти атрофидаги манбаси Киевнинг ҳали ҳам Вашингтон ва Москванинг Саудия Арабистонидаги учрашувига таклиф қилинмаганини тасдиқлади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
