Европа Иттифоқи давлатлари Украинадаги ҳарбий можарода тажовузкор томон сифатида айбланаётган Россияга қарши навбатдаги — 19-пакет санкцияларни маъқуллади. Бу қарор 22 октябрь куни Брюсселда бўлиб ўтган Европа кенгаши йиғилиши арафасида қабул қилинди, деб хабар берди Reuters агентлиги Дания ҳукуматининг расмий баёнотига таяниб.
«Биз хурсандмизки, ЕИнинг барча аъзо давлатлари 19-санкция пакети бўйича ечимга келди ва эътирозларини олиб ташлашга рози бўлди. Ёзма тартибдаги расмий тасдиқ жараёни бошланди. Агар қаршилик бўлмаса, пакет эртага соат 8:00 гача қабул қилинади», — дейилади баёнотда.
Брюсселдаги манбаларнинг маълум қилишича, Москвага қарши чекловлар якдиллик билан маъқулланган. Сўнгги бўлиб қаршиликни Словакия қайтариб олган бўлса, Австрия ҳам аввалроқ пакетни тўсмаслигини билдирган эди. Шу билан Европа Иттифоқи Россияга нисбатан иқтисодий ва сиёсий босимни янада кучайтиришга қарор қилди.
Маълум бўлишича, Венгрия бош вазири Виктор Орбан мажлисга кечикиб келган ва ўз овозини Словакия бош вазири Роберт Фицога топширган.
Еврокомиссия 19-пакетни сентябрь ойининг ўрталарида тайёрлаган ва унда энергетика соҳасига оид жиддий чекловлар белгиланган. Хусусан, 2027 йил 1 январдан бошлаб Россиядан суюлтирилган табиий газ (LNG) импортини бутунлай тақиқлаш режалаштирилган. Шунингдек, «соядаги флот» деб аталувчи Россияга тегишли кемалар рўйхати кенгайтирилади.
Янги санкциялар нафақат Москва компанияларига, балки Россия энергоресурсларини четлаб ўтиб савдо қилаётган учинчи мамлакатлар ва уларнинг фирмаларига ҳам қўлланилади. Бу, айниқса, криптовалюта орқали амалга оширилаётган операцияларга тааллуқли бўлади.
Кутилишича, пакет «Роснефть» ва «Газпром нефть» билан ҳар қандай битимларни тақиқлайди ҳамда Россия нефтига қўйилган нарх чегарасини янада пасайтиради. Бу орқали Европа Иттифоқи Россия иқтисодиётининг асосий манбаи бўлган энергия экспортини босим остида ушлаб туришни мақсад қилган.
ЕИда муҳокама давомида россиялик фуқароларга туристик Шенген визаларини беришни чеклаш таклифи ҳам кўриб чиқилган, бироқ якунда визавий чекловлар рўйхатга киритилмади.
Шундай қилиб, Европа Иттифоқи янги санкциялар орқали Россияга нисбатан узоқ муддатли босим сиёсатида яна бир муҳим қадам ташлади. Мутахассислар фикрича, бу қарор нафақат иқтисодий жиҳатдан, балки сиёсий нуқтаи назардан ҳам Москва учун жиддий сигнал ҳисобланади.
“Zamin”ни Telegram'да ўқинг!
