Шавкат Мирзиёев BlackRock раҳбарияти билан Ўзбекистон иқтисодиётининг истиқболларини муҳокама қилди
Президент Шавкат Мирзиёев Давосдаги ишчи ташрифи доирасида BlackRock компанияси директорлар кенгаши аъзоси ва катта бошқарувчи директори Адебайо Огунлеси билан учрашди. Суҳбатда дунёдаги энг йирик инвестиция фондининг Ўзбекистон иқтисодиётидаги иштирокини кенгайтириш бўйича аниқ йўналишлар кўриб чиқилди. Бу ҳақда podrobno.uz хабар беради.
BlackRock активларни бошқариш бозорида етакчи ўринни эгаллаган бўлиб, сармоялари глобал иқтисодиётнинг деярли барча муҳим тармоқларини қамраб олади. Швейцариядаги музокараларда компаниянинг бир қатор йирик ўзбек корхоналари капиталига кириши ҳамда қўшма инвестиция механизмларини йўлга қўйиш масалаларига урғу берилди.
Томонлар, шунингдек, Ўзбекистонда инвестиция муҳитини яхшилаш учун фонднинг халқаро тажрибасини жалб этиш ташаббусларини қўллаб-қувватлади. Бундай йирик инвесторнинг мамлакат лойиҳаларига қизиқиши бошқа глобал сармоядорлар учун ҳам бозорнинг очиқлиги ва ишончлилигини кўрсатувчи муҳим сигнал сифатида баҳоланмоқда.
Айни пайтда Давос форуми BlackRock раҳбари Ларри Финкнинг Жаҳон иқтисодий форумини ўтказиш манзилини тубдан ўзгартириш ҳақидаги таклифлари фонида ўтмоқда. У анъанавий Давос ўрнига жадал ривожланаётган ҳудудлардаги майдонларни кўриб чиқишни, муқобил вариант сифатида Жакарта, Буэнос-Айрес ёки Детройтни тилга олган.
Маълумотларга кўра, 1971 йилдан бери форум жойи фақат бир марта — 2002 йилда Нью-Йоркка кўчирилган. Бу йилги Давос саммитига 60 давлат раҳбари ва 800 дан ортиқ йирик компаниялар топ-менежерлари йиғилди. Дастлаб Украинадаги инқироз муҳокамаси режалаштирилган бўлса-да, кун тартиби қайта кўриб чиқилди ва асосий мавзулардан бири Гренландия атрофидаги вазият бўлди.
“Zamin”ни Telegram'да ўқинг!
