Тошкент вилояти Паркент туманида давлат захирасида бўлган ер майдонини ноқонуний равишда сотишга уринган шахслар қўлга олинди. Ҳолат ҳуқуқни муҳофаза қилувчи органлар томонидан ўтказилган тезкор тадбир давомида фош этилган.
Маълум қилинишича, Паркент туманидаги маҳалла фуқаролар йиғинларидан бирининг раиси ҳамда 1970 йилда туғилган фуқаро давлат захирасидаги 10 сотих ер майдонини харидорга 20 минг АҚШ доллари эвазига сотишга келишган. Улар ерни расмийлаштириш ишларини гўёки қонуний йўл билан ҳал қилиб беришини айтган.
Ушбу шахслар Давлат кадастрлари палатасининг туман филиали муҳандисига 2-3 минг АҚШ доллари бериш орқали ер майдонига тегишли ҳужжатларни расмийлаштириб беришни ваъда қилган. Яъни давлат захирасидаги ерни шахсий манфаат йўлида сотишга уриниш ҳолати юзага келган.
Давлат хавфсизлик хизмати ходимлари Иқтисодий жиноятларга қарши курашиш департаменти ҳамда ички ишлар органлари билан ҳамкорликда тезкор тадбир ўтказди. Тадбир давомида маҳалла раиси, кадастр муҳандиси ва 1970 йилда туғилган фуқаро 17 минг АҚШ доллари ҳамда 37 миллион сўм олган вақтларида ашёвий далиллар билан ушланган.
Бу ҳолат ер билан боғлиқ масалаларда ҳали ҳам айрим шахслар ноқонуний йўллар орқали фойда кўришга уринаётганини кўрсатади. Айниқса, давлат захирасидаги ер майдонларини сотиш ёки сохта ҳужжатлар орқали расмийлаштиришга ҳаракат қилиш жамият ва қонун олдида жиддий жиноят ҳисобланади.
Ҳозирда ушбу шахсларга нисбатан жиноят иши қўзғатилган. Тергов ҳаракатлари давом этмоқда ва воқеанинг барча тафсилотлари ҳуқуқий жиҳатдан ўрганилмоқда.
Қисқаси, Паркентдаги ушбу ҳолат яна бир бор ер масаласида қонундан четга чиқиш оғир оқибатларга олиб келишини кўрсатди. Давлат ери — кимнингдир шахсий мулки эмас. Уни “гаплашиб ҳал қиламиз” дейдиганлар учун эса энди қонун жавоб беради.
“Zamin”ни Telegram'да ўқинг!
