Алишер Узоқов Гулнора Каримова даврида бир неча йилга «запрет»га тушгани ҳақида сўзлади

Актёр Алишер Узоқов «Chotki TV» YouTube-каналига берган интервьюсида 2012 йилда бир неча йилга «запрет»га тушгани, запрет уни бутунлай бошқа инсонга айлантиргани ҳақида сўзлаб берди.

Кибрга берилган пайтларим кўп бўлган, расмга тушайлик, дейишганида кетиб қолганман кайфиятим йўқ пайтлар. Аммо менинг кайфиятим билан кимнинг нима иши бор? Бу каби ҳолатлар кўп бўлган. Қачон шунақа бўлиб қолганимни «запрет»га тушганимда англаганман. Бу нарса менга жуда яхши таъсир қилди. «Запрет»га тушиш мени яхши тарафга ўзгартирди. «Запрет»дан чиққанимда бошқа одам бўлиб қолгандим, назаримда. Аммо ҳалигача «запрет»нинг сабабини билмайман. Ҳаттоки «запрет» қилган одам ким, нимага бундай қилганини ҳам билмайман. Ҳамма нарсадан чеклов бўлди. Рол ўйнамадим, ўйнаган фильмларим чиқмади. Ҳаттоки қайсидир концертда меҳмон бўлиб ўтирганимни ҳам олиб ташлашган вазиятлар бўлган экан, — дейди актёр.

Алишер Узоқовнинг тахмин қилишича, унинг норасмий тақиққа тушишига Гулнора Каримова ташаббуси билан ҳар йили анъанавий тарзда ўтказилган M&TVA тақдирлаш маросимида бирйўла икки номинацияда ғолиб деб топилиши сабаб бўлган бўлиши мумкин.

Бошловчининг у бундай тақиқдан қандай хулоса чиқаргани ҳақидаги саволига Алишер шундай жавоб берди:

Билмасам, охирги 2012 йил бир эмас, иккита M&TVA’ни олганимда ҳаммани кўзига кўриниб қолган бўлсам керак, деб ўйлайман. Иккита олганим учун ҳам кўзга кўриниб қолдим, шекилли, менимча. Айнан мени тақиққа туширган инсонлар, у пайт мени топиш муаммо эмасди, Алишер, мана буни қилиб қўйгандинг, хатойинг шу эди, деса. Мен қўлини ўпаман шу одамнинг, раҳмат дейман. Сиз мени хатойимни айтяпсиз, эртага шуни қилмай, ҳали ёшман-ку?! Динимизда ҳам бор хатосини, камчилигини айтиш. Мен ҳар доим айтаман ва кўпчилик хафа ҳам бўлади. Яқинларимга тўғридан-тўғри айтаман камчиликларини, менга айтишмайди. Ҳалиям кеч эмас, ўша одам билса, чақириб айтсин. Раҳмат, дейман, қаерда эдингиз шунча йилдан бери, дейман. Хато қилган бўлсам, билишим керак, ўша хатони эртага такрорламаслигим учун. Яна такрорлашни хоҳламайман, чунки ҳамма ҳам хато қилади, — дейди Алишер Узоқов.

Шунингдек, актёр Дубайга оиласи билан ишлаш учун кўчиб кетгани, бироқ бегона юртга кўника олмай, яна Тошкентга қайтгани ҳақида ҳам гапириб ўтган.

Бундан ташқари, Алишер Узоқов «Zo‘r TV» телеканалидан ишдан кетганидан кейин ҳам бир муддат телеканалдаги ҳатто ўз лойиҳаларида ҳам тақиқда бўлганини сўзлаб берган.

«Бекат» кўрсатувида иштирок этиш учун бормоқчи эдим, лекин кўрсатув бошловчиси Жаҳонгир Хўжаев мен телеканалда «запрет»да эканлигимни айтди. Бу кўрсатув ўзимнинг лойиҳам эди. Лекин бунақа нарсалар менинг эсимдан чиқиб кетади. Кейинроқ Cover up’га меҳмон сифатида чақиришди, кўрсатувни соғинганим учун бордим. Бундан ташқари, ўз қўшиқларимнинг cover версиясини ҳам эшитгим келди, — дейди актёр.

Алишер Узоқов, Гулнора Каримова, Запретга тушиш, Кибрга берилган “Замин” янгиликларини “Youtube”да кузатиб боринг