Нидерландиялик машҳур мутахассис Эрик тен Хаг Леверкузеннинг “Байер” клубидаги қисқа фаолиятини якунлаб, катта миқдорда компенсация пулига эга бўлди. Германиянинг Sport Bild нашри тарқатган маълумотларга кўра, у ишдан бўшатилгани учун тахминан 5 миллион евро тўлов олган.
Эслатиб ўтамиз, Эрик тен Хаг “аспиринлар”ни шу йил май ойида қабул қилиб олган эди. Аммо Германия чемпионатидаги янги мавсумни у омадсиз бошлади. Бундеслиганинг дастлабки икки турида “Байер” фақат биттагина очко жамғарди ва бу натижа клуб раҳбариятини жиддий ташвишга солди.
Эндиликда Леверкузен жамоаси ички чемпионатнинг навбатдаги баҳсида ўз уйида Франкфуртнинг “Айнтрахт” клубига қарши тўқнаш келади. Учрашув 12 сентябр, жума куни соат 23:30 да (Тошкент вақти билан) старт олади.
Эрик тен Хагнинг мураббийлик фаолиятида салмоқли натижалар бор. У “Манчестер Юнайтед”да ишлаган вақтда Англия кубоги ва Лига кубогини ютиб олган. Шунингдек, “Аякс” жамоаси бошқарувида Нидерландия чемпионлигини уч марта қўлга киритган.
Бунга қарамай, “Байер”даги қисқа саёҳати ортидан у мослашишга улгурмай, ўз лавозимини тарк этди ва энди келгуси фаолияти ҳақида саволлар янада кўпайди.
«Замин»ни Telegram’да ўқинг!
