АҚШнинг Лас-Вегас шаҳрида ўтказилган UFC 328 турнири ўз якунига етди. Жанг оқшоми мухлисларга кескин тўқнашувлар, сабмишнлар, нокаутлар ва кутилмаган натижаларни тақдим этди. Айниқса, кечанинг марказий жанги — Хамзат Чимаев ва Шон Стрикленд ўртасидаги қарама-қаршилик катта қизиқиш билан кузатилди.
Асосий жангда америкалик Шон Стрикленд таниқли ММА устаси Хамзат Чимаевга қарши октагонга кўтарилди. Муросасиз кечган баҳсда Стрикленд очколар ҳисобида ғалаба қозониб, чемпионлик камарини қўлга киритди. Бу натижа UFC мухлислари орасида катта муҳокамаларга сабаб бўлиши аниқ. Чунки Чимаев жанг олдидан фаворитлардан бири сифатида кўрилган, аммо Стрикленд ўзининг тажрибаси, сабри ва тактик режаси билан муҳим ғалабани илиб кетди.
Кечанинг яна бир эътиборли жангида Жошуа Ван Тацуро Тайрани 5-раундда техник нокаутга учратиб, чемпионлик камарини ўзида сақлаб қолди. Ушбу тўқнашув ҳам томошабинларга ҳақиқий чемпионлик характери қандай бўлишини кўрсатди.
Оғир вазн тоифасида Александр Волков Валдо Кортес-Акостага қарши октагонга чиқди. Жанг тўлиқ давом этди ва якунда ҳакамлар якдил қарори билан Волков ғалаба қозонди. Ҳакамлар 30-27, 29-28, 29-28 ҳисобларини қайд этишди.
Шон Брэди ҳам Хоакин Баклига қарши жангда ишончли ҳаракат қилди. У ҳакамларнинг якдил қарорига кўра ғалаба қозонди. Ҳисоблар 30-25, 30-25 ва 30-27 кўринишида бўлди. Бу натижа Брэдийнг тайёргарлиги ва октагондаги устунлигини яққол кўрсатди.
Кеча давомида тезкор якунланган жанглар ҳам кўп бўлди. Жим Миллер биринчи раундда Жаред Гордонни бўғиш усули билан мағлуб этди. Бобби Грин эса биринчи раундда Стивенсни сабмишн орқали таслим қилди. ММАда “вақт бор” деган гап йўқ — бир хато, бир ушлаш, тамом.
Ярослав Амосов иккинчи раундда Йоэл Альваресни бўғиш усули билан мағлубиятга учратди. Атеба Готье эса иккинчи раундда Оззи Диазни нокаутга учратиб, мухлисларга ёрқин жанг тақдим этди.
UFC 328 натижалари:
- Хосе Очоа ҳакамларнинг якдил қарори билан Клэйтон Карпентерни мағлуб этди — 30-27, 30-27, 30-27.
-Байсангур Сусуркаев 3-раундда Жордан Сантосни сабмишн орқали енгди.
-Пэт Сабатини очколар ҳисобида Уильям Гомисдан устун келди.
-Роман Копылов Марко Тулиони ҳакамларнинг якдил қарори билан мағлуб этди — 29-28, 29-28, 29-28.
-Жим Миллер 1-раундда Жаред Гордонни бўғиш усули билан таслим қилди.
-Грант Доусон 3-раундда Матеуш Ребетскини сабмишн орқали мағлуб этди.
-Ярослав Амосов 2-раундда Йоэл Альваресни бўғиш усули билан енгди.
-Атеба Готье 2-раундда Оззи Диазни нокаутга учратди.
-Бобби Грин 1-раундда Стивенсни сабмишн орқали таслим қилди.
-Шон Брэди ҳакамларнинг якдил қарори билан Хоакин Баклини мағлуб этди — 30-25, 30-25, 30-27.
-Александр Волков ҳакамларнинг якдил қарори билан Валдо Кортес-Акостадан устун келди — 30-27, 29-28, 29-28.
-Жошуа Ван 5-раундда Тацуро Тайрани техник нокаутга учратиб, чемпионлик камарини ҳимоя қилди.
-Шон Стрикленд очколар ҳисобида Хамзат Чимаевни мағлуб этиб, чемпионлик камарини қўлга киритди.
Умуман олганда, UFC 328 турнири мухлислар учун жуда қизиқарли ва воқеаларга бой кечди. Стрикленднинг Чимаев устидан қозонган ғалабаси кечанинг энг катта воқеаси бўлди. Энди ММА оламида асосий савол битта: Чимаев бу мағлубиятдан қандай хулоса чиқаради ва Стрикленд чемпионлик камарини қанча вақт ушлаб тура олади?
“Zamin”ни Telegram'да ўқинг!
