Лука Модрич Милан билан амалдаги шартномасини узайтиришга тайёр, бироқ 40 ёшли ярим ҳимоячининг Сан Сирода қолиши икки муҳим шартнинг бажарилишига боғлиқ бўлиб турибди. Хорватиялик юлдуз Массимилиано Аллегри қўл остида ажойиб мавсумни ўтказди, аммо унинг келажаги Чемпионлар лигаси йўлланмаси ва мураббийнинг жамоада қолишига бевосита боғлиқ. Бу ҳақда Goal.com хабар беради.
Kalsiomerkato.it хабарига кўра, Модрич 30-июн куни якунига етадиган шартномасини узайтириб, Италиядаги саргузаштларини давом эттирмоқчи. Ўтган йилнинг июль ойида жамоага келиб қўшилган фахрий футболчи ўз шартномасини 2027-йилгача узайтириш бандига эга. У Реал Мадрид клубидаги фаолиятидан фарқли ўлароқ, Милан сафида кўпроқ ҳимоявий ролда ўйнашга муваффақиятли мослашди ва ўзининг профессионаллиги билан барчани ҳайратда қолдирди.
2018-йилги "Олтин тўп" соҳиби қизил-қора либосда қолиши учун биринчи навбатда Милан Чемпионлар лигаси йўлланмасини қўлга киритиши лозим. Тажрибали плеймейкер келаси мавсумда Европанинг энг нуфузли турнирида иштирок этишни истайди. Якшанба куни Каляри жамоасига қарши бўлиб ўтадиган ҳал қилувчи баҳс бу борада катта аҳамиятга эга, чунки кучли тўртликдан жой олиш Модричнинг асосий талабини қондиради.
Иккинчи муҳим шарт эса Массимилиано Аллегрининг бош мураббий лавозимида қолишидир. Мавсум давомида мураббий ва футболчи ўртасида кучли ўзаро ҳурмат шаклланди. Аллегри Модричнинг янги тактик вазифаларни сўзсиз қабул қилганини юқори баҳолайди. Ҳатто келажакда Лука Модрич бутсасини михга илганидан сўнг, Аллегрининг мураббийлар штабидан жой олиши ҳам тахмин қилинмоқда.
Клубдаги келажаги ҳал бўлгач, Лука Модрич бор эътиборини Хорватия терма жамоаси билан Жаҳон чемпионатига қаратади. У ўз миллий жамоасини гуруҳ босқичида Англия, Панама ва Ганага қарши баҳсларда сардор сифатида майдонга бошлаб тушади.
“Zamin”ни Telegram'да ўқинг!
