Эрлинг Холанд Англия Премер-лигасининг сўнгги туридан ўрин олган Астон Виллага қарши баҳсда Манчестер Сити қайдномасига киритилмади. Жамоани тарк этаётган бош мураббий Пеп Гуардиола мухлислар билан хайрлашув учрашуви олдидан норвегиялик ҳужумчининг йўқлиги сабабларини тушунтириб ўтди. Бу ҳақда Goal.com хабар беради.
Ҳафта ўртасида Борнмут билан дуранг ўйнаб, чемпионлик пойгасида Арсеналга имкониятни бой берган Манчестер Сити учун ушбу ўйин турнир жадвали жиҳатидан аҳамиятини йўқотган эди. Шу сабабли, каталониялик мутахассис асосий эътиборни байрамона муҳит яратиш ва футболчиларга дам беришга қаратди. Гуардиола таркибда жами тўққизта ўзгаришни амалга оширди.
"Бу таркиб узоқ вақт ўйнамаган футболчиларнинг аралашмасидир. Биз Бернардо Силва ва Джон Стоунз каби ўйинчиларни мухлислар олқишлари остида кузатиб қўймоқчимиз. Агар бу ўйин чемпионлик тақдирини ҳал қиладиган финал бўлганида, таркиб бутунлай бошқача кўриниш оларди", — деди мураббий ўйин олдидан берган интервюсида.
Ҳиссий жиҳатлардан ташқари, Эрлинг Холанднинг йўқлигида амалий сабаблар ҳам бор. Ҳужумчи оғир мавсумдан сўнг Норвегия терма жамоаси сафига Жаҳон чемпионати саралаш ўйинларига қўшилиши кутилмоқда. Мураббийлар штаби футболчининг жисмоний ҳолатини асраш мақсадида унга дам беришга қарор қилди.
Гарчи сўнгги турни ўтказиб юборган бўлса-да, Эрлинг Холанд Англия Премер-лигасининг "Олтин бутса" совринини деярли нақд қилиб қўйган. У жорий мавсумда 27 та гол уриб, энг яқин таъқибчиси Брентфорд ҳужумчиси Игор Тиагони 5 та голга ортда қолдирмоқда.
“Zamin”ни Telegram'да ўқинг!
