Наполи клуби Антонио Конте кетганидан сўнг бўшаб қолган бош мураббий лавозимига Массимилиано Аллегри номзодини асосий вариант сифатида кўриб чиқмоқда. "Стадио Диего Армандо Марадона"да янги даврни бошлаш учун клуб раҳбарияти юқори тажрибага эга мутахассисни олиб келишни мақсад қилган. Душанба куни Милан клубидан истеъфога чиқарилган Аллегри Неапол клуби учун кутилмаган, аммо жиддий номзодга айланди. Бу ҳақда Goal.com хабар беради.
Италиялик таниқли журналист Джанлука Ди Марзио берган хабарга кўра, клуб президенти Аурелио Де Лаурентиис айнан Аллегрини жамоани янги ғалабалар сари етаклай оладиган энг муносиб мураббий деб ҳисобламоқда. Антонио Конте расман кетганидан сўнг, Неаполдаги вазият тезлик билан ўзгарди. Скудетто ва Италия Суперкубогини қўлга киритган Конте давридан кейин клуб раҳбарияти бошқа йўналишда ривожланишга қарор қилди.
Массимилиано Аллегри учун Милан жамоасидаги иккинчи давр омадсиз якунланди. Жамоа Чемпионлар лигаси йўлланмасидан маҳрум бўлиб, мавсумни бешинчи ўринда тугатгани унинг истеъфосига сабаб бўлди. Шунга қарамай, Аллегрининг Италия футболидаги обрўси ва тажрибаси Де Лаурентиисни ўзига жалб қилмоқда. Мураббийнинг Милан билан 2027-йилгача шартномаси бўлишига қарамай, жанубга кўчиб ўтиш варианти у учун айни муддао бўлиши мумкин.
Ушбу трансферда Наполи спорт директори Гиованни Манна муҳим рол ўйнамоқда. Манна аввалроқ Ювентус клубида Аллегри билан бирга ишлаган ва улар ўртасида мустаҳкам алоқа мавжуд. Кальциомеркато нашрининг ёзишича, Манна аллақачон Милан шаҳрида Аллегри билан кечки овқат пайтида учрашиб, келажакдаги режаларни муҳокама қилган. Томонлар тез орада келишувга эришиши кутилмоқда.
“Zamin”ни Telegram'да ўқинг!
