Германиялик мутахассис Ралф Рангникк Милан клубида туб ислоҳотларни амалга ошириш учун асосий номзод сифатида кўрилмоқда. Хабарларга кўра, 67 ёшли мураббий ва клуб раҳбарияти ўртасида музокаралар ҳал қилувчи паллага кирган. Бир неча йил аввал Сан Сирога ўтиши амалга ошмаган Рангникк, бу сафар янада кенгроқ ваколатлар билан қайтиши мумкин. Бу ҳақда Goal.com хабар беради.
Вена шаҳрида бўлиб ўтган учрашувда Милан хўжайини Геррй Кардинале ва клуб маслаҳатчиси Златан Ибрагимович иштирок этган. Унда Ралф Рангникк Австрия терма жамоасидаги фаолиятини якунлагач, клубда қандай тизим яратмоқчи эканлиги бўйича ўз шартларини баён қилган. Ла Gazzetta делло Sport нашрининг ёзишича, гап мураббийлик ҳақида эмас, балки бутун техник департаментни назорат қилувчи супервайзерлик лавозими ҳақида бормоқда.
Рангниккнинг талаблари анча жиддий: у асосий жамоа мураббийини мустақил танлаш, ўзининг скаутлар ва таҳлилчилардан иборат катта штабини олиб келиш ҳамда ёшлар академиясини ягона тизимга бирлаштиришни истамоқда. РедБирд раҳбарияти учун бу Ред Булл тизимидаги каби ёш иқтидорларни кашф этиш ва ривожлантиришга асосланган муваффақиятли моделни жорий этиш имкониятидир.
Ҳозирда Австрия терма жамоаси билан Жаҳон чемпионатига тайёргарлик кўраётган мутахассис ўз келажаги борасида эҳтиёткорлик билан гапирмоқда. Гарчи Австрия футбол федерацияси унга маошини оширишни таклиф қилаётган бўлса-да, Милан каби гранд жамоада инқилобий ўзгаришлар қилиш чорлови Рангниккни кўпроқ қизиқтириши мумкин.
“Zamin”ни Telegram'да ўқинг!
