Маями шаҳри Лионель Месси MLSга келганидан бери ҳақиқий футбол жазавасини бошдан кечирмоқда. Эндиликда “қуёшли штат” 2026-йилги Жаҳон чемпионати вақтида шотландиялик мухлисларнинг катта оқимини кутиб олишга ҳозирлик кўрмоқда. Роберт Снодграсснинг таъкидлашича, Шотландия терма жамоаси мухлислари Шимолий Америка майдонларида тарихий натижа қайд этилишига умид қилиб, шаҳарда ўзгача байрам муҳитини яратишади. Бу ҳақда Goal.com хабар беради.
Саккиз карра “Олтин тўп” соҳиби Лионель Месси Барселона ва PSJдаги ёрқин фаолиятидан сўнг, 2023-йилнинг ёзида Манчестер Юнайтед афсонаси Давид Бекхам эгалик қиладиган Интер Миами клубига келиб қўшилган эди. Тарихдаги энг кўп соврин ютган футболчи сифатида у АҚШда футболнинг оммавийлигини янги босқичга олиб чиқди ва NFL ҳамда NBA юлдузлари билан рақобатлаша оладиган даражадаги қизиқишни уйғотди.
Шотландия терма жамоаси 1998-йилдан бери илк бор Жаҳон чемпионатига йўлланма олиб, ХХИ асрдаги дебютини нишонлаш арафасида турибди. Собиқ футболчи Снодграсснинг сўзларига кўра, натижалардан қатъи назар, шотландиялик ишқибозлар Маями соҳилларида унутилмас муҳит ҳосил қилишади. “Мухлислар ўз мамлакатини қўллаб-қувватлаш учун бирлашади ва вақтни чоғ ўтказишади. Маями пляжларида Шотландия байроқларини кўришимиз аниқ”, — дейди у.
Шотландия шу пайтгача саккизта йирик турнирда иштирок этган бўлса-да, ҳеч қачон гуруҳ босқичидан чиқа олмаган. 1978-йилда Арчие Геммилл томонидан Нидерландия дарвозасига урилган афсонавий гол каби ёрқин лаҳзалар бўлган, бироқ жамоа плей-офф босқичига чиқишни ҳали ҳам орзу қилмоқда. 2026-йилги мундиал улар учун ушбу нохуш анъанага чек қўйиш имконияти бўлиши мумкин.
“Zamin”ни Telegram'да ўқинг!
