НетБлоккс мониторинг хизмати Жанубий Африкада интернет алоқаси сифати сезиларли даражада ёмонлашганини қайд этди. Бу ҳолат мамлакатда юз берган кенг кўламли табиий офатлар ва об-ҳаво шароитининг кескин ёмонлашуви билан боғлиқ. Бу ҳақда Ixbt.com хабар беради.
Кузатув маълумотларига кўра, Ғарбий Кап провинцияси алоқа узилишларидан энг кўп зарар кўрган ҳудудга айланди. Интернетдаги носозликлар электр энергиясининг оммавий равишда ўчирилиши билан бир вақтга тўғри келди.
Мамлакат ҳукумати кучли ёмғирлар, сув тошқинлари, шиддатли шамол ва қор ёғиши сабабли миллий фавқулодда ҳолат эълон қилди. Табиий офат инфратузилма ишини издан чиқарди ва турли ҳудудлардаги асосий хизматлар фаолиятига салбий таъсир кўрсатди.
Ҳозирда мутахассислар тармоқ барқарорлигини тиклаш устида ишламоқда, бироқ электр таъминотидаги узилишлар интернет провайдерларининг нормал ишлашига тўсқинлик қилмоқда.
“Zamin”ни Telegram'да ўқинг!
