Samsung компанияси Galaxy S26 туркумидаги смартфонларга бўлган юқори талабни қондириш мақсадида ишлаб чиқариш режаларини қайта кўриб чиқмоқда. ЗДНет Кореа нашри хабарига кўра, компания май ойи учун ишлаб чиқариш кўрсаткичини 2,4–2,5 миллион донага етказди. Дастлабки режаларда бу кўрсаткич 1,9–2,1 миллион дона этиб белгиланган эди. Бу ҳақда Ixbt.com хабар беради.
Бу жорий йилда ишлаб чиқариш ҳажмининг иккинчи марта оширилиши ҳисобланади. Апрел ойида ҳам Samsung дастлабки 2,4 миллион дона режасини 3 миллион донага қадар кўпайтиришга мажбур бўлган эди. Янги маълумотларга кўра, май ойида 1 миллион дона Galaxy S26, 200 минг дона Galaxy S26+ ҳамда 1,2–1,3 миллион дона Galaxy S26 Ultra ишлаб чиқарилиши кўзда тутилган.
Саноат экспертларининг таъкидлашича, одатда янги флагманлар тақдим этилганидан икки ой ўтиб бутловчи қисмларга бўлган буюртмалар камайишни бошлайди. Бироқ Galaxy S26 ҳолатида бундай пасайиш кузатилмаяпти ва буюртмалар ҳажми юқори даражада қолмоқда. Бу эса фойдаланувчиларнинг мазкур туркумга бўлган қизиқиши кутилганидан узоқроқ давом этаётганини англатади.
“Zamin”ни Telegram'да ўқинг!
