Стилта компанияси патентларни таҳлил қилиш учун 10,5 миллион доллар жалб қилди

Тадбиркор Оскар Блок ва унинг ҳамкорлари интеллектуал мулк соҳасидаги мураккаб жараёнларни автоматлаштиришга қаратилган Стилта сунъий интеллект платформасини ишга туширди. Лойиҳа патентлар билан боғлиқ суд жараёнлари ва тадқиқот ишларини тезлаштириш ҳамда арзонлаштиришни мақсад қилган. Бу ҳақда Techcrunch.com хабар беради.

Стилта стартапи Andreessen Horowitz (a16z) бошчилигидаги инвестиция раундида 10,5 миллион доллар маблағ тўплади. Шунингдек, ушбу молиялаштиришда Й Комбинатор ҳамда OpenAI, Легора ва Lovable каби компаниялар вакиллари иштирок этди.

Платформа ишлаш принципи бўйича тажрибали юристлар жамоасини эслатади. Фойдаланувчи патент рақамини тизимга киритгач, сунъий интеллект агентлари тармоқ орқали ўхшаш патентларни қидиради, суд тарихини таҳлил қилади ва далилларга асосланган батафсил ҳисоботларни тақдим этади.

Блокнинг таъкидлашича, кўплаб компаниялар ўз патентларидан фойдаланмайди ёки уларни тўғри таҳлил қила олмайди, чунки бу жараён жуда қиммат ва вақт талаб қилади. Стилта айнан шу тўсиқни олиб ташлаб, компанияларга ўз интеллектуал мулкининг яширин қийматини очишга ёрдам беради.