Европол бошчилигидаги халқаро ҳуқуқ-тартибот идоралари кибержиноятчилар орасида машҳур бўлган Фирст VPN хизматига қарши кенг кўламли операцияни якунлади. Саффрон деб номланган операция доирасида 27 та давлатда жойлашган 33 та сервер мусодара қилинди. Тергов маълумотларига кўра, ушбу сервис ноқонуний фаолиятни яшириш учун махсус платформа вазифасини ўтаган. Бу ҳақда Ixbt.com хабар беради.
Операцияда 18 та давлат, жумладан, Франция, Буюк Британия, Нидерландия ва Швейцария куч тузилмалари иштирок этди. Фирст VPN тармоғининг 1vpns.com, 1vpns.net, 1vpns.org каби асосий доменлари ҳамда Тор тармоғидаги .онион манзили блокланди. Ҳозирда ушбу сайтларга кирилганда ҳуқуқни муҳофаза қилиш органларининг махсус хабарномаси пайдо бўлмоқда.
Фирст VPN ўзини ҳеч қандай юрисдикцияга бўйсунмайдиган ва расмийлар билан ҳамкорлик қилмайдиган аноним сервис сифатида реклама қилиб келган. Платформа айниқса рус тилидаги кибержиноят форумларида фаол тарғиб қилинган. Европолнинг таъкидлашича, ушбу хизмат сўнгги йиллардаги кўплаб йирик киберҳужумларда қўлланилган ва уни фош этиш учун беш йилга яқин вақт сарфланган.
Мутахассислар бундай "буллетпрооф" (ўқ ўтмас) VPN хизматларини қонуний провайдерлардан фарқлаш лозимлигини айтишмоқда. Оддий VPN компаниялари қонун доирасида ишлайди ва расмий сўровларга жавоб беради, буллетпрооф-сервислар эса атайлаб қонунбузарликлар ва шикоятларга эътибор бермай, фақат "соя"даги бозорга хизмат кўрсатади.
Ушбу операция фонида Европада рақамли махфийлик чегаралари бўйича баҳслар яна авж олди. Бир томондан, интернетда конфиденциаллик ҳуқуқи ЕИ қонунчилигида мустаҳкамланган бўлса, иккинчи томондан, кибержиноятчиликка қарши кураш чоралари интернет устидан назоратнинг кучайишига олиб келиши мумкинлигидан хавотирлар билдирилмоқда.
“Zamin”ни Telegram'да ўқинг!
