Универсал Мусик Груп (УМГ) ва TikTok лицензиялаш шартномасини янгилаганини эълон қилди. Мазкур келишув платформадаги рухсатсиз сунъий интеллект (AI) ёрдамида яратилган мусиқаларни ўчириш ҳамда санъаткорлар ва қўшиқ муаллифларига тегишли муаллифлик ҳуқуқларини ҳимоя қилишни кўзда тутади. Бу ҳақда Techcrunch.com хабар беради.
УМГ баёнотига кўра, янги келишув инсон ижодкорлигини қўллаб-қувватлаш ва платформадан тушадиган даромадларнинг адолатли тақсимланишини таъминлашга қаратилган. TikTok ва УМГ биргаликда рухсатсиз AI-контентларни платформадан олиб ташлаш ва муаллифларни кўрсатиш тизимини такомиллаштириш устида иш олиб боради.
Ушбу ҳамкорлик икки гигант ўртасидаги муносабатларда муҳим бурилиш нуқтаси бўлди. 2024-йил бошида УМГ TikTok'ни муаллифлик ҳуқуқларини етарли даражада ҳимоя қилмасликда айблаб, ўз мусиқий каталогини платформадан вақтинча олиб ташлаган эди. Бу низо натижасида миллионлаб видеолар мусиқасиз қолиб кетган ва TikTok йирик лейблар билан ҳисоблашишга мажбур бўлган.
Мусиқа саноати сўнгги йилларда санъаткорларнинг овозини тақлид қилувчи ва алгоритмларни алдовчи AI воситаларидан жиддий хавотирда эди. Масалан, Драке ва Те Веекнд каби юлдузларнинг овози билан яратилган сохта треклар миллионлаб марта тингланиб, катта шов-шувга сабаб бўлган эди. Янги келишув бошқа технологик компаниялар учун ҳам интеллектуал мулкни ҳимоя қилишда намуна бўлиши кутилмоқда.
TikTok ўз навбатида мусиқа саноати учун фойдали ҳамкор эканини исботлашга уринмоқда. Ўтган йили ишга туширилган “TikTok фор Артистс” платформаси санъаткорларга ўз ижодини тарғиб қилиш ва таҳлилий маълумотларга эга бўлиш имконини беради. Эндиликда AI-контентлар устидан назоратнинг кучайиши ижодкорларнинг ҳуқуқларини янада мустаҳкамлайди.
“Zamin”ни Telegram'да ўқинг!
