«Manchester Yunayted»ning vaqtinchalik bosh murabbiyi Maykl Kerrik Carrington mashg'ulot bazasida klub egasi Ser Jim Ratkliff bilan uchrashganini ma'lum qildi. INEOS rahbari jamoa qarorgohiga tashrif buyurib, sobiq yarim himoyachi bilan norasmiy suhbat qurgan.
Bu haqda Goal.com xabar beradi.
Ushbu uchrashuv klub yangi doimiy murabbiy borasida yakuniy qaror qabul qilish arafasida yuz berdi.
Ratkliff futbol operatsiyalarini o'z nazoratiga olganidan beri klub hayotida faol ishtirok etmoqda. Garchi u murabbiylar shtabining kelajagi borasida ochiq va'dalar bermagan bo'lsa-da, uning mashg'ulot bazasiga tashrifi jiddiy o'zgarishlardan darak bermoqda.
Kerrikning so'zlariga ko'ra, uchrashuv juda erkin va do'stona muhitda o'tgan.
«Biz bir piyola choy ustida suhbatlashdik. Bu shunchaki norasmiy uchrashuv edi va uning qo'llab-quvvatlashini ko'rish yoqimli bo'ldi.
Klubda barcha bo'g'inlar bir-biri bilan chambarchas bog'langan va men ham o'z vazifamni bajarishga harakat qilyapman», — dedi Kerrik «Brentford»ga qarshi o'yin oldidan o'tkazilgan matbuot anjumanida.
Hozirda klub rahbariyati Kasemiro o'rniga yangi tayanch yarim himoyachisi, chap qanot himoyachisi va tajribali hujumchi qidirmoqda. Biroq yangi murabbiy tayinlanmaguncha transferlar amalga oshirilmaydi.
Bu yangi mutaxassisga o'z taktik qarashlariga mos tarkibni shakllantirish imkonini beradi.
«Manchester Yunayted»ning asosiy maqsadi mavsumni kuchli beshlikda yakunlab, Chempionlar ligasi yo'llanmasini qo'lga kiritishdir. Dushanba kuni «Brentford» ustidan qozoniladigan g'alaba jamoaning turnir jadvalidagi mavqeini mustahkamlaydi va «Liverpul»ga qarshi bo'ladigan muhim bahs oldidan qo'shimcha ishonch bag'ishlaydi.
“Zamin”i Telegram'da okuyun!
