295
AQSh Mudofaa vazirligi Grönlandiyada joylashgan Pituffik harbiy bazasi qo‘mondoni, polkovnik Suzanna Meyersni lavozimidan ozod qildi. Pentagon bu qarorni Tramp siyosatiga qarshi harakatlar fonida qabul qilinganini bildirdi.
“Zanjirli boshqaruvga putur yetkazuvchi harakatlarga yoki Tramp kun tartibini sabotaj qilishga yo‘l qo‘yilmaydi,” — dedi Pentagon matbuot kotibi Shon Parnell.
Nizoni boshlab bergan elektron xat
Rasmiy sabab ko‘rsatilmagan bo‘lsa-da, Pentagon e’lon bilan birga Military.com maqolasiga havola bergan. Unga ko‘ra, 31 mart kuni Meyers bazadagi harbiylarga elektron xat yuborib, AQSh vitse-prezidenti JD Vensning tashrifidan norozilik bildirgan.
“Men siyosatni yaxshi tushunmayman, lekin Vens janobning so‘zlari Pituffik ruhini ifodalamaydi. Bu yerda barcha bayroqlar yonma-yon hilpiraydi,” — deb yozgan Meyers, AQShning Grönlandiyaga da’volarini nazarda tutib.
Vens nima degan edi?
Vitse-prezident JD Vens 28 mart kuni Pituffik harbiy bazasiga tashrif buyurib, orolni Daniyadan ajratish va AQSh nazoratiga o‘tkazish kerakligini ta’kidlagan.
“Xitoy va Rossiya tahdidiga qarshi Grönlandiya xavfsizligini AQSh ta’minlashi lozim,” — degan edi u.
Tramp ma’muriyati ilgari ham Grönlandiyani AQShga qo‘shish bo‘yicha bayonotlar bergan.
Daniya javobi: “Grönlandiya sotilmaydi”
Daniya tashqi ishlar vaziri Lars Løkke Rasmussen Tramp ma’muriyatining bayonotlarini tanqid qilgan. Grönlandiyaning yangi bosh vaziri Jens-Frederik Nielsen esa shunday degan:
“Grönlandiya sotilmaydi. Trampning bu yondashuvi siyosiy mustaqilligimizga tahdiddir.”
AQSh va Daniya o‘rtasidagi vaziyat vaqti-vaqti bilan keskinlashmoqda. Oq uy esa orol bo‘yicha da’volaridan voz kechgani yo‘q.
Siz nima deb o‘ylaysiz — Grönlandiya kimniki bo‘lishi kerak: Daniyaningmi yoki AQShning?
12:20, 3-04-2025
