Abu-Dabida bo‘lib o‘tgan uchrashuvda Ozarbayjon prezidenti Ilhom Aliyev va Armaniston bosh vaziri Nikol Pashinyan ikki davlat o‘rtasidagi munosabatlarni yumshatish va barqaror yo‘lga qo‘yish masalasidagi so‘nggi qadamlarni muhokama qildi. Rasmiy ma’lumotga ko‘ra, tomonlar AQSH prezidenti Donald Tramp vositachiligi va ishtiroki bilan Vashingtonda o‘tgan tinchlik sammitida erishilgan kelishuvlar bajarilishi bo‘yicha kuzatilayotgan ijobiy siljishlarni olqishladi.
Yetakchilarning asosiy urg‘usi bir narsaga borib taqaldi: pozitiv sur’atni yo‘qotmaslik. Ya’ni, normallashtirish jarayoni “bo‘ldi-endi” degan kayfiyatda emas, muntazam muloqot va amaliy ishlar bilan olg‘a surilishi kerakligi ta’kidlandi.
Muhokamada tinchlikning “qog‘ozda” emas, hayotda sezilayotgan belgilari ham alohida qayd etildi. Xususan, ikki tomonlama savdo boshlangani, Ozarbayjondan Armanistonga neft mahsulotlari yetkazib berish davom etayotgani aytildi. Shuningdek, uchinchi davlatlardan Ozarbayjon hududi orqali Armanistonga don va boshqa tovarlar tranziti amalga oshirilayotgani mamnuniyat bilan tilga olindi. Tomonlar savdo-iqtisodiy aloqalarni kengaytirish imkoniyatlarini yanada chuqurroq o‘rganishga kelishib oldi — demak, bu hali “boshlanish”, davomi bor.
Uchrashuvda ishonchni mustahkamlash masalasi ham chetda qolmadi. Yetakchilar fuqarolik jamiyati vakillarining o‘zaro tashriflarini qo‘llab-quvvatlagani, bunday muloqotlar odamlar orasidagi masofani qisqartirishi mumkinligi aytildi. Ya’ni, “siyosatchilar gaplashyapti”dan tashqari, jamiyatlar ham bir-birini qayta taniy boshlashi kerak — shu yerda tinchlikning haqiqiy “immuniteti” paydo bo‘ladi.
Shu bilan birga, kommunikatsiya va aloqa yo‘nalishidagi loyihalar ham muhokama qilindi. Xususan, TRIPP loyihasi va shu sohaga oid boshqa tashabbuslarni amalga oshirish masalalari ko‘tarildi. Bu esa oddiy qilib aytganda: yo‘llar, aloqalar, o‘tish-o‘tkazish mexanizmlari ishlasa — kelishuvlar “real rejim”ga o‘tadi.
Yakunda Aliyev va Pashinyan ikki mamlakat o‘rtasida tinchlik va barqarorlikni yanada kuchaytirish bo‘yicha sa’y-harakatlarni davom ettirishga tayyor ekanini yana bir bor tasdiqladi. Eng muhimi, tomonlar normallashtirish jarayoniga ko‘maklashish uchun aloqalarni uzmaslik, muloqotni to‘xtatmaslikka kelishib oldi.
Qisqasi, uchrashuvning ruhi shunday: muzokara — shou emas, uzoq marafon. Lekin agar savdo ishlayapti, tranzit yuryapti, odamlar bordi-keldi qila boshlayapti — demak, yo‘l to‘g‘ri. Endi faqat tezlikni yo‘qotmaslik kerak, xolos.
“Zamin”ni Telegramʻda oʻqing!
