18-qavatdan qulagan qiz mo‘jizaviy tarzda tirik qoldi

Xitoyda 20 yoshli qiz 18-qavatli turar joy balkonidan qulaganiga qaramay, hayot qolishga muvaffaq bo‘ldi. Bu haqda South China Morning Post nashri xabar berdi.

Ma’lum qilinishicha, voqea 12 iyul kuni tonggi soat 4:00 atrofida sodir bo‘lgan. Qiz yigiti bilan chiqqan janjaldan so‘ng balkondan o‘zini tashlagan. Qulash paytida daraxt shoxlari uning tushish tezligini sekinlashtirgan va u butalar ustiga tushgani sababli omon qolgan.

Hodisadan keyin yigiti uni zudlik bilan shifoxonaga olib borgan va davolanishi uchun dastlabki 20 ming yuan (taxminan 3 ming AQSH dollari) to‘lagan.

Shifokorlar tekshiruvi natijasida qizning bosh qismi, o‘pkasi, jigari va talog‘i jarohatlangani, shuningdek, tos suyagi, chanoq qismi va ikki oyog‘i singani aniqlangan. U ikki marta jarrohlik amaliyotini boshdan kechirgan.

Xabarda aytilishicha, qiz voqeadan ikki kun avval yigiti bilan munosabatlariga nuqta qo‘yishga qaror qilgan va Yunnan viloyatiga qaytish uchun poyezd chiptasini ham sotib olgan. Biroq 11 iyul kuni chiqqan navbatdagi janjaldan so‘ng yigiti uning shaxsiy guvohnomasi va mobil telefonini olib qo‘ygan, shuningdek, uy eshigini qulflab qo‘ygan.

Bu voqea qizning oilasi davolanish xarajatlarini qoplash uchun ommaviy axborot vositalari orqali yordam so‘ragach keng jamoatchilikka ma’lum bo‘lgan. Qizning onasiga 2022 yilda saraton tashxisi qo‘yilgan bo‘lib, oila avvaldan moliyaviy qiyinchiliklarni boshdan kechirayotgan edi.

Hozirga qadar tibbiy xarajatlar 100 ming yuandan oshib ketgan. Oila shifoxonadan qarzdor bo‘lib qolgan, shu bilan birga onlayn xayriya platformasi orqali 90 ming yuan mablag‘ to‘plashga muvaffaq bo‘lgan.