Inson hayotida orzu va maqsadlar doimo uni oldinga yetaklaydigan kuch hisoblanadi. Kimdir katta uy olishni istaydi, yana kimdir yaxshi kasb egasi bo‘lishni, moliyaviy erkinlikka chiqishni yoki oilasini baxtli qilishni orzu qiladi. Ammo vaqt o‘tishi bilan ayrim insonlar o‘z maqsadlariga yetish uchun harakat qilish o‘rniga, mavjud hayotiga ko‘nikib qoladi. Ana shu holat “komfort zona” deb ataladi.
Komfort zona — bu inson o‘zini xavfsiz va tinch his qiladigan, lekin rivojlanishdan to‘xtaydigan holatdir. Eng xavflisi ham shu — odam bu holatda ekanini ko‘pincha o‘zi ham sezmaydi. Chunki barchasi “normal” tuyuladi: ish bor, ovqat bor, kun o‘tyapti. Ammo qalbning ichkarisida kattaroq hayotga, kattaroq natijaga bo‘lgan ehtiyoj asta-sekin so‘nib boradi.
Ko‘pchilik insonlar bir vaqtlar ulkan maqsadlar bilan yashagan. Ular boy bo‘lishni, o‘z biznesini ochishni, chet ellarda o‘qishni yoki hayotini butunlay o‘zgartirishni orzu qilgan. Biroq yillar o‘tib, “mayli shu ham yomon emas”, “hamma shunday yashayapti”, “tavakkal qilish xavfli” degan fikrlar ongni egallay boshlaydi. Aynan shu nuqtadan inson o‘z orzularidan uzoqlasha boshlaydi.
Komfort zona insonni sekin-asta harakatsizlikka o‘rgatadi. U yangi imkoniyatlardan qo‘rqadi, o‘zgarish qilishni orqaga suradi, katta qarorlar qabul qilishdan qochadi. Vaqt o‘tgan sari esa afsuslar ko‘payib boradi. Chunki inson qalban o‘zi bundan ko‘prog‘iga qodirligini his qilib turadi.
Psixologlarning ta’kidlashicha, rivojlanish doimo ma’lum darajada noqulaylik bilan keladi. Yangi ish boshlash, bilim olish, sport bilan shug‘ullanish yoki moliyaviy ahvolni yaxshilash uchun inson avval o‘zining ichki qo‘rquvlarini yengishi kerak bo‘ladi. Komfort zonadan chiqmagan odam esa o‘z imkoniyatlarining haqiqiy chegarasini hech qachon bilmay o‘tib ketishi mumkin.
Hayotda katta natijalarga erishgan insonlarning deyarli barchasi bir vaqtlar qiyin qaror qabul qilgan. Ular o‘zini qiynagan bo‘lsa ham harakatdan to‘xtamagan. Chunki orzu faqat o‘ylab yurish uchun emas, unga intilish uchun beriladi.
Bugungi hayotingiz sizga tinch va barqarordek tuyulishi mumkin. Ammo agar qalbingizda hali ham ulkan maqsadlar yashab turgan bo‘lsa-yu, siz ular uchun hech narsa qilmayotgan bo‘lsangiz, demak siz komfort zona domiga tushib qolgan bo‘lishingiz mumkin.
Eng muhimi, bu holatdan chiqish kech emas. Ba’zan bitta qaror, bitta harakat yoki bitta jasorat inson hayotini butunlay o‘zgartirib yuborishi mumkin. Hayot esa doimo harakat qilayotganlarni yaxshi ko‘radi.
“Zamin”ni Telegramʻda oʻqing!
