Dunyoda atigi 450 tasi qolgan yo‘lbarslar bolaladi

Buyuk Britaniyadagi Longleat Safari Park sayyohlik bog‘ida yo‘qolib ketish xavfi ostidagi Amur yo‘lbarslarining yana bir nasli dunyoga keldi. E’tiborli jihati shundaki, ikki egizak yo‘lbars bolasi 29 iyul — Xalqaro yo‘lbarslar kunida tug‘ilgani bu voqeani yanada ramziy ahamiyatga ega qildi.

Ma’lum qilinishicha, bolalar bog‘da yashovchi Red va Yana juftligining uchinchi nasli hisoblanadi. Hozircha egizaklarning jinsi ham, ismlari ham aniqlanmagan. Bog‘ni parvarishlovchilar avvalgi yillarda bo‘lgani kabi, ularga nom tanlash jarayoniga jamoatchilikni ham jalb qilishi mumkinligini bildirmoqda.

Bog‘ tomonidan e’lon qilingan videoda yangi tug‘ilgan yo‘lbarschalarning bir-biriga suyanib yotgani, ovoz chiqarayotgani va onasi Yana ularni ehtiyotkorlik bilan yalab parvarish qilayotgani aks etgan. Ushbu lavhalar ijtimoiy tarmoqlarda katta qiziqish uyg‘otdi.

Safari bo‘limi rahbari Emi Uoller bu voqeani katta yutuq deb baholadi.

«Yo‘qolib borayotgan ushbu noyob hayvonlarning yana bir naslini qarshi olish biz uchun katta baxt. Ayniqsa, bu voqea safari bog‘imizning 60 yilligi arafasida sodir bo‘lgani yanada ahamiyatli. Yana ajoyib ona bo‘lib, shu vaqtgacha oltita bolani muvaffaqiyatli katta qilgan. Shuning uchun uning tajribasiga to‘liq ishonamiz», — dedi u.

Mutaxassislarning aytishicha, yo‘lbars bolalari taxminan olti oy davomida ona suti bilan oziqlanadi, keyin esa asta-sekin go‘sht iste’mol qilishga o‘rgatiladi. Hozirning o‘zidayoq bolalar sog‘lom va baquvvat o‘sib borayotgani qayd etilgan. Shu sababli ona yo‘lbarsga odatdagidan ko‘proq ozuqa berilmoqda.

Amur yo‘lbarsi dunyodagi eng yirik yovvoyi mushuksimon hayvon hisoblanadi. Tabiatni muhofaza qilish xalqaro ittifoqi (IUCN) uni yo‘qolib ketish xavfi ostidagi tur sifatida baholagan. Mutaxassislar ma’lumotiga ko‘ra, tabiatda ularning taxminan 450 tasigina saqlanib qolgan.

Longleat Safari Park Yevropa ko‘paytirish dasturida (EEP) faol ishtirok etmoqda. Ilgarigi nasldan tug‘ilgan uchta yo‘lbars boshqa bog‘larga ko‘chirilgan bo‘lsa, birinchi nasldagi Yuki allaqachon o‘z bolalarini dunyoga keltirgan.

Hozirda bog‘da yettita Amur yo‘lbarsi yashamoqda. Ular orasida Red, Yana, Heidi, Seeka, Dora-Boo hamda yangi tug‘ilgan ikki egizak bola bor. Bu esa Longleat'ni Buyuk Britaniyadagi eng katta Amur yo‘lbarslari oilasiga ega safari bog‘iga aylantirgan.

Ma’lumot uchun, Yana va Redning avvalgi nasli 2024 yil may oyida tug‘ilgan bo‘lib, unda to‘rt urg‘ochi bola — Ginger Biscuit, Dora-Boo, Heidi va Seeka dunyoga kelgan edi. Ularning ismlari jamoatchilik ovozi orqali tanlangan. Juftlikning birinchi nasli esa 2019 yilda, Longleat Safari Park'da 20 yillik tanaffusdan keyin tug‘ilgan bo‘lib, unda Rusty va Yuki nomli ikki yo‘lbars bolasi dunyoga kelgan.