Makadamiya nafaqat noyob ta’mi, balki inson salomatligi uchun katta foydasi bilan ham qadrlanadi. Uning yumshoq, qaymoqsimon va yengil vanilga o‘xshash ta’mi ko‘pchilikka yoqadi. Shu bilan birga, tarkibida organizm uchun muhim bo‘lgan qimmatli moddalar juda ko‘p.
Makadamiyaning asosiy foydalari
Makadamiya tarkibining katta qismi qimmatli yog‘ kislotalaridan iborat. Ular yurak-qon tomir tizimini qo‘llab-quvvatlaydi va “yomon” xolesterinni kamaytirishga yordam beradi.
Vitamin va minerallar manbai
Ushbu yong‘oq E va B guruhi vitaminlari, magniy, kaliy, temir hamda ruxga boy. Bu moddalar immunitetni mustahkamlaydi, asab tizimini tinchlantiradi va teri holatini yaxshilaydi.
Makadamiya tarkibidagi oqsil va kletchatka uzoq vaqt to‘qlik hissini saqlab turadi va hazm jarayonini yaxshilaydi.
Makadamiyani me’yorida iste’mol qilish muhim
Bu yong‘oq yuqori kaloriyali mahsulot hisoblanadi. 100 grammida taxminan 720 kkal mavjud. Shu sababli kuniga 5–7 dona iste’mol qilish yetarli bo‘ladi.
Sifatli makadamiyani qanday tanlash kerak?
Yong‘oq sotib olayotganda uning rangi och kremsimon bo‘lishiga, yoqimsiz hid chiqmasligiga va qadoqi havo o‘tkazmaydigan bo‘lishiga e’tibor berish lozim. Qovurilgan turini olsangiz, tuz va sun’iy qo‘shimchalarsiz variantini tanlagan ma’qul.
Makadamiyani qanday chaqish mumkin?
Makadamiyaning po‘stlog‘i juda qattiq bo‘ladi. Agar yong‘oq oldindan yorilgan bo‘lsa, maxsus metall kalitcha yordamida oson ochiladi. Yorilmagan bo‘lsa, yong‘oq chaquvchi moslama yoki qisqichdan foydalaniladi. Ko‘pchilik uchun eng qulay variant — tozalangan makadamiya xarid qilish.
“Zamin”ni Telegramʻda oʻqing!
