Qozog‘istonda otaning qizini labidan o‘payotgani aks etgan lavhalar bahs-munozaralarga sabab bo‘ldi

Qozog‘istonning Sharqiy Qozog‘iston viloyatida erkakning 12 yoshga to‘lgan qizini tug‘ilgan kunida labidan o‘payotgani aks etgan video ijtimoiy tarmoqlarda keng muhokamalarga sabab bo‘ldi. Ayrim foydalanuvchilar otaning xatti-harakatini keskin tanqid qilib, holat yuzasidan tekshiruv o‘tkazishni talab qildi.

Ota esa tanqidlarga javoban voqeaga oydinlik kiritdi. Uning so‘zlariga ko‘ra, qizining 12 yoshga to‘lgani uni hayajonga solgan va u farzandining bolalik davrini eslab, mehr ko‘rsatgan. Erkak qizini labidan o‘pmaganini, balki yonoqlari va burnidan o‘pganini, videoda esa tasvir noto‘g‘ri rakursdan olinganini ta’kidlagan.

Ota-ona bildirilgan tanqidlarga javoban o‘zlarini oqlashga majbur emasliklarini aytgan. Shuningdek, oila advokat bilan maslahatlashib, surat va videolarini roziligisiz tarqatgan shaxslar ustidan sudga murojaat qilish niyatida ekanini bildirgan.

Bundan tashqari, ota-ona haqoratli va yolg‘on izohlar yozgan ikki foydalanuvchi ustidan ham ariza berganini ma’lum qilgan.

Ayni paytda politsiya holat yuzasidan tekshiruv olib bormoqda.